(ស៊ីដនី)៖ ទីភ្នាក់ងារស្ទាបស្ទង់ភូមិសាស្ត្រអាមេរិក (USGS) នៅថ្ងៃសុក្រនេះបានឱ្យដឹងថា គ្រោះរញ្ជួយដីកម្រិត ៦.៩រ៉ិចទ័រ បានវាយប្រហារលើកោះ ញូប្រ៊ីធិន (New Britain) នៃឆ្នេរប្រទេសប៉ាពួរញូហ្គីណេ ខណៈលទ្ធភាពដែលអាចកើតមានរលកយក្សស៊ូណាមិ ក៏ត្រូវបានគេព្យាករណ៍នៅតាម ឆ្នេរមួយចំនួនផងដែរ។ នេះបើតាមការចេញផ្សាយដោយ សារព័ត៌មាន BBC នៅព្រឹកថ្ងៃសុក្រ ទី៣០ ខែមីនា ឆ្នាំ២០១៨។
យោងតាម USGS គ្រោះរញ្ជួយដីនេះមានជំរៅ ១០គីឡូម៉ែត្រ ទៅក្នុងដីស្ថិតនៅចំងាយ ១៦២គីឡូម៉ែត្រ ពីទីក្រុង រ៉ាប៊ល (Rabaul) នៃកោះ New Britain។ វាបានកើតឡើងនៅក្បែរតំបន់ឆ្នេរ នៅម៉ោងប្រមាណ ០៧៖២៥នាទីព្រឹក ថ្ងៃសុក្រនេះ។ ប៉ុន្តែភ្លាមៗ ពុំទាន់មានសេចក្ដីរាយការណ៍ពីការខូចខាត និងជនរងគ្រោះនៅឡើយទេ។
គួរបញ្ជាក់ថា កាលពីល្ងាចថ្ងៃចន្ទដើមសប្តាហ៍នេះ គ្រោះរញ្ជួយផែនដី ដែលមានកម្រិតរហូតដល់ទៅ ៧.០រ៉ិចទ័រ បានវាយប្រហារដែនសមុទ្រ នៃប្រទេសប៉ាពួញូហ្គីណេ នៅតំបន់មួយដែលមានចម្ងាយ ១៨០គីឡូម៉ែត្រ នៃភាគខាងលិចក្រុង Rabaul នៃកោះ New Britain ដែលញ័រចេញពីជម្រៅដី ១០គីឡូម៉ែត្រ ប៉ុន្តែវាមិនបានបង្កឲ្យមានជនរងគ្រោះ ឬរលកយក្សស៊ូណាមិនោះឡើយ៕
