(ម៉ូស្គូ)៖ តំណាងពាណិជ្ជកម្មពិសេសរុស្ស៊ី ប្រចាំសហរដ្ឋអាមេរិក លោក អាឡេសានដឺ ស្ទេដនីក (Aleksander Stadnik) បាននិយាយថា លោកត្រូវបាន ទីក្រុងវ៉ាស៊ីនតោន បណ្ដេញចេញពីប្រទេសដោយប្រកាសថា លោកជាមនុស្សមិនគួរទទួលស្វាគមន៍ (persona non grata)។ នេះ បើតាមការចេញផ្សាយដោយ សារព័ត៌មាន Sputnik នៅព្រឹកថ្ងៃសុក្រ ទី៣០ ខែមីនា ឆ្នាំ២០១៨។
បេសកកម្មពាណិជ្ជកម្មរុស្ស៊ី ក្នុងទីក្រុងវ៉ាស៊ីនតោន គឺជាទ្រព្យសម្បត្តិទូតមួយក្នុងចំណោមបី ដែលត្រូវបានរដ្ឋបាលប្រធានាធិបតីអាមេរិក លោក ដូណាល់ ត្រាំ បញ្ជាឱ្យបិទទ្វារកាលពីឆ្នាំ២០១៧។ ការសម្រេចចិត្តនេះ គឺជាការឆ្លើយតបនឹងទីក្រុងម៉ូស្គូ សម្រាប់ការបណ្ដេញមន្ត្រីទូតអាមេរិកជាងពាក់កណ្ដាល ដូចដែលសហរដ្ឋអាមេរិកបានធ្វើមកលើរុស្ស៊ី ក្នុងសំណុំរឿងចោទប្រកាន់ថា ទីក្រុងម៉ូស្គូ បានលូកដៃចូលក្នុងកិច្ចការបោះឆ្នោតអាមេរិក ក្នុងឆ្នាំដដែល។
ថ្លែងប្រាប់សារព័ត៌មាន Sputnik លោក Aleksander Stadnik បានគូសបញ្ជាក់យ៉ាងដូច្នេះថា «ក្រោយបេសកកម្មពាណិជ្ជកម្មរុស្ស៊ី នៅក្នុងសហរដ្ឋអាមេរិក ត្រូវបានបិទទ្វារកាលពីខែកញ្ញា ឆ្នាំ២០១៧ ការសម្រេចចិត្តបញ្ចូលខ្ញុំក្នុងបញ្ជីឈ្មោះទូត ត្រូវបណ្ដេញចេញ មិនមានអ្វីគួរឱ្យភ្ញាក់ផ្អើលនោះទេ... ប៉ុន្តែវាគឺជាទង្វើអវិជ្ជមានជ្រុលហួសហេតុ របស់សហរដ្ឋអាមេរិក ដែលនឹងធ្វើទំនាក់ទំនងរវាងប្រទេសទាំងពីរ កាន់តែអាក្រក់ឡើងប៉ុណ្ណោះ»។
គួរបញ្ជាក់ថា ជុំវិញសង្រ្គាមការទូតនេះដែរ រដ្ឋាភិបាលរុស្ស៊ីកាលពីថ្ងៃព្រហស្បតិ៍ បានប្រកាសបណ្ដេញមន្ត្រីទូតអាមេរិក ៦០នាក់ ព្រមទាំងបិទស្ថានកុងស៊ុលអាមេរិក នៅក្នុងទីក្រុង St. Petersburg ជាការសងសឹកនឹងទីក្រុងម៉ូស្គូ ដែលបានបណ្ដេញមន្ត្រីរុស្ស៊ី ០៦នាក់ ចេញពីប្រទេសពាក់ព័ន្ធនឹងការបំពុលសម្លាប់អតីតមន្ត្រីចារកម្មរុស្ស៊ី នៅលើទឹកដីអង់គ្លេស៕
