(ពិភពលោក)៖ នៅថ្ងៃព្រហស្បតិ៍ ទី២៩ ខែមីនា ឆ្នាំ២០១៨នេះ ព្រឹត្តិការណ៍អន្តរជាតិសំខាន់ៗ ជាច្រើនបានកើតឡើង រួមមានទាំងព្រឹត្តិការណ៍នយោបាយ និងស្ថានការណ៍ទូទាំងសកលលោកដ៏គួរឲ្យចាប់អារម្មណ៍ជាច្រើន។ ដូច្នេះបើចង់ដឹងថាតើព្រឹត្តិការណ៍រូបភាពប្រចាំថ្ងៃនេះមានអ្វីខ្លះនោះសូមទស្សនាដូចខាងក្រោម៖
១៖ ការផ្ទុះអំពើហិង្សា និងគ្រោះអគ្គីភ័យក្នុងកន្លែងឃុំឃាំងនៅឯស្ថានីយប៉ូលិសមួយកន្លែង ក្នុងទីក្រុង វ៉ាឡេនសៀ (Valencia) នៃប្រទេសវេណេស៊ុយអេឡា បានផ្តាច់ជីវិតមនុស្ស ៦៨នាក់ ដែលភាគច្រើនបំផុតជាទណ្ឌិត៕
២៖ ប្រធានាធិបតីបារាំង លោក អ៊ែមម៉ានុយអែល ម៉ាក្រុង (Emmanuel Macron) នឹងទៅបំពេញទស្សនកិច្ចនៅប្រទេសរុស្ស៊ី នាខែឧសភា ឆ្នាំ២០១៨នេះ ខណៈវានៅតែជារឿងសំខាន់ដដែល ក្នុងការរក្សាការពិភាក្សាទាក់ទងគ្នា ដោយទៀងត្រង់ និងបើកចំហជាមួយទីក្រុងម៉ូស្គូ ទោះបីជាបច្ចុប្បន្ន កំពុងមានរុស្ស៊ីកំពុងរងការចោទប្រកាន់ថា មានជាប់ពាក់ព័ន្ធនឹងករណីប្រើអាវុធគីមី បំពុលសម្លាប់អតីតមន្រ្តីចារកម្មរុស្ស៊ី នៅលើទឹកដីអង់គ្លេសយ៉ាងណាក្តី៕
៣៖ កូរ៉េខាងត្បូង និងកូរ៉េខាងជើង នៅថ្ងៃព្រហស្បតិ៍នេះ បានព្រមព្រៀងគ្នាថា រៀបចំកិច្ចប្រជុំកំពូលអន្តរកូរ៉េ នៅថ្ងៃទី២៧ ខែមេសា ខាងមុខនេះ ខណៈបងប្អូនកូរ៉េទាំងពីរ កំពុងសម្លឹងមើលការផ្សះផ្សាទំនាក់ទំនង ដើម្បីបន្ធូរបន្ថយភាពតានតឹងផ្នែកយោធា នៅលើឧបទ្វីបកូរ៉េ៕
៤៖ នៅចុងសប្តាហ៍នេះ មន្ទីរពិសោធន៍អវកាសចិន Tiangong-1 ដែលមានន័យថា វិមានឋានសួគ៌នោះ ទីបំផុតនឹងធ្លាក់ចូលមកដល់បរិយាកាស នៃភពផែនដី ហើយឆាបឆេះនៅក្នុងស្ថានភាពដែលអ្នកវិទ្យាសាស្រ្ត មិនអាចគ្រប់គ្រងវាបានឡើយ៕
៥៖ កងកម្លាំងយុទ្ធសាស្ត្រមីស៊ីលរុស្ស៊ី (RSMF) បានបញ្ចប់ទាំងស្រុងហើយ នូវផ្នែកមួយនៃការបំពាក់អាវុធឡើងវិញជាមួយ ប្រព័ន្ធចល័តមីស៊ីលឆ្លងទ្វីប ICBM ឈ្មោះថា Yars៕
៦៖ ប្រធានាធិបតីអាមេរិក លោក ដូណាល់ ត្រាំ បានសម្ដែងការសាទរ ចំពោះជំនួបរវាងប្រធានាធិបតីចិន លោក ស៊ី ជិនពីង និងមេដឹកនាំកូរ៉េខាងជើង លោកគីម ជុងអ៊ុន ដែលធ្វើឡើងជាសម្ងាត់ នៅក្នុងទីក្រុងប៉េកាំងកាលពីថ្ងៃអាទិត្យកន្លងទៅ ហើយថា បច្ចុប្បន្នវាគឺជាឱកាសសម្រាប់លោក គីម ធ្វើរឿងល្អដល់ប្រជាជនរបស់ខ្លួន៕
