(សេអ៊ូល)៖ កូរ៉េខាងត្បូង និងកូរ៉េខាងជើង នៅ​ថ្ងៃព្រហស្បតិ៍នេះ បានព្រមព្រៀង​គ្នាថា រៀបចំកិច្ចប្រជុំកំពូល​អន្តរកូរ៉េ នៅថ្ងៃទី២៧ ខែមេសា ខាងមុខនេះ ខណៈបងប្អូន​កូរ៉េទាំងពីរ កំពុងសម្លឹងមើល​ការផ្សះផ្សា​ទំនាក់ទំនង ដើម្បីបន្ធូរបន្ថយភាពតាន​តឹង​ផ្នែកយោធា នៅលើ​ឧបទ្វីបកូរ៉េ។ នេះបើតាម​ការចេញផ្សាយ​ដោយ ទីភ្នាក់ងារ​សារព័ត៌មាន យ៉ុនហាប់ នៅរសៀលថ្ងៃព្រហស្បតិ៍ ទី២៩ ខែមីនា ឆ្នាំ២០១៨។

សម្រេចចិត្តបែបនេះ ធ្វើឡើងបន្ទាប់ពីជំនួបពិភាក្សាមួយ នៅថ្ងៃព្រហស្បតិ៍នេះ រវាងមន្រ្តីជាន់ខ្ពស់កូរ៉េខាងជើង និងកូរ៉េខាងត្បូង នៅតំបន់តុងជីលហ្កាក់ (Tongilgak) ដែលស្ថិត​នៅលើទឹកដី​របស់​កូរ៉េខាងជើង​ក្នុងភូមិ ផាន់មុនចុម (Panmunjom) ខណ្ឌចែក ព្រំដែន​​កូរ៉េទាំងពីរ។ ជាមួយគ្នានោះដែរ បើតាមលទ្ធផល​នៃកិច្ចពិភាក្សនេះ ប្រធានាធិបតីកូរ៉េខាងត្បូង លោក មូន ជែអ៊ីន និងមេដឹកនាំកូរ៉េខាងជើង លោក គីម ជុងអ៊ុន នឹងជួបគ្នាជាលើកដំបូងជាប្រវត្តិសាស្ត្រ នៅឯវិមានសន្តិភាព ស្ថិត​នៅលើទឹកដី​កូរ៉េខាងត្បូង ក្នុងភូមិផាន់មុនចុម (Panmunjom) នៅថ្ងៃទី២៧ ខែមេសា។

បន្ថែមពីលើនេះ ភាគីទាំងពីរក៏​បានឯកភាពគ្នា​ផងដែរថា នឹងរៀបចំកិច្ច​សន្ទនាមួយទៀត នៅថ្ងៃទី០៤ ខែមេសា នៅក្នុងភូមិ​ផាន់មុនចុម (Panmunjom) សំដៅ​​ពិភាក្សាគ្នា​អំពី​ពិធីសារ​សន្តិសុខពាក់ព័ន្ធនឹង​ជំនួបកំពូល​អន្តរកូរ៉េ។

គួរបញ្ជាក់ថា ក្រោយត្រូវ​សហរដ្ឋអាមេរិក និងចិនដែល​ជាខ្នងបង្អែករបស់ខ្លួន រួមទាំងអង្គការ​សហប្រជាជាតិ ព្រួតគ្នា​ដាក់ទណ្ឌកម្ម​សេដ្ឋកិច្ច ក្នុងឆ្នាំ២០១៨នេះ កូរ៉េខាងជើង ហាក់ដូចជាបន្ទន់​ឥរិយាបថយ៉ាងខ្លាំង។ ជាក់ស្ដែង​ក្រោយជំនួបជាមួយលោក ស៊ី ជិនពីង កាលពីប៉ុន្មាន​ថ្ងៃមុនេះ លោក គីម ជុងអ៊ុន ថែមទាំងអះ​អាងទៀតផង​ដែរ អំពីការប្ដេជ្ញាចិត្តលុបបំបាត់​អាវុធ​នុយក្លេអ៊ែរ៕