(ព្រុចសែល)៖ នៅទីបំផុត​បណ្តាញសង្គមយក្ស​នៅលើពិភពលោក Facebook ដែលមាន​ដើមកំណើត និងស្នាក់ការ​កណ្តាលនៅសហរដ្ឋអាមេរិក​នោះ បានប្រកាស​ចេញ​នូវវិធីសាស្ត្រថ្មី​របស់ខ្លួនហើយ នៅក្នុងការការពារសុវត្ថិភាព នៃព័ត៌មានផ្ទាល់ខ្លួន របស់អ្នក​ប្រើប្រាស់រាប់ពាន់លាននាក់ ទូទាំងសកលលោក។ នេះបើតាមការចេញផ្សាយដោយ Reuters នាល្ងាចថ្ងៃពុធ ទី២៨ ខែមីនា ឆ្នាំ២០១៨។

សម្រាប់ចំណាត់​ការថ្មីខាងលើនេះ គឺអ្នកប្រើប្រាស់​ទាំងឡាយ នឹងមាននូវការ​បន្ថែម​មុខងារ «Privacy Shortcuts» ដែលអាចឲ្យ​ពួកគេធ្វើការគ្រប់គ្រង​ព័ត៌មានផ្ទាល់ខ្លួនបន្ថែម កាន់តែប្រសើរ​ជាងមុនទៀត។ បន្ថែមពីនេះ​អ្នកប្រើប្រាស់ Facebook ទាំងឡាយ អាចធ្វើការពិនិត្យ​អំពីអ្វីដែលពួកគេ​បានចែករំលែក​រួចទៅហើយ និងអាចលុបចេញនូវ​ព័ត៌មានផ្សេងៗ​ផ្ទាល់ខ្លួនពួកគេ បើសិនជា​គិតថា ខ្លួនមិនចង់បង្ហាញ បូករួមទាំងការ Download ទិន្នន័យ​របស់ពួកគេ ហើយផ្ទេរវា​ទៅកាន់សេវាកម្ម​ផ្សេងទៀត​បានផងដែរ។

ជុំវិញវិធីសាស្ត្រ​ថ្មីខាងលើនេះ ក្រុមការងារ Facebook បាន​បញ្ជាក់ថា «អ្វីដែល​បានកើតឡើង​កាលពី​សប្តាហ៍មុន បានបង្ហាញអំពី​កិច្ចខិតខំប្រឹងប្រែង​បន្ថែមរបស់​យើង ដែលត្រូវការ​ដើម្បីបង្កើន​ការគ្រប់គ្រង​បទបញ្ជាផ្សេងៗ ព្រមទាំងជួយ​ឲ្យអ្នកប្រើប្រាស់​យល់ដឹង​អំពីការងារ​ទាំងឡាយ​របស់ Facebook និងជម្រើស​នានា ដែលពួកគេមាន​ក្នុងការគ្រប់គ្រង​ទិន្នន័យផ្ទាល់ខ្លួន។ ដូច​លោក Mark បានប្រកាស​កាលពីសប្តាហ៍មុន​ហើយ​មានដូចជា ការបោសសម្អាត​ការរំលោភលើ Facebook Platform, ការបង្កើន​ការអនុវត្ត​​បទបញ្ជាផ្ទៃក្នុង និងការធ្វើឲ្យមាន​ភាពងាយស្រួល ដល់អ្នកប្រើប្រាស់ អាចជ្រើសយក​មុខងារគ្រប់គ្រង​ទិន្នន័យ​ខ្លួនឯង»។

គួរបញ្ជាក់ថា គ្រាន់តែ​ការប្លែកធ្លាយ​ព័ត៌មាន ទាក់ទងនឹង​ការលួចប្រើប្រាស់​ទិន្នន័យសម្ងាត់​នៃអ្នក​ប្រើប្រាស់ Facebook ជាង ៥០លាន​នាក់នោះ ក្រុមហ៊ុនយក្ស​នៅអាមេរិក​នេះ បាន ខាតបង់ភាគហ៊ុនក្នុង​ទីផ្សារសរុប ១០០ពាន់​លានដុល្លារ ដែលប្រការ​នេះជម្រុញឲ្យ លោក Mark Zuckerberg ចេញមុខ​បកស្រាយដោយ​ផ្ទាល់ និងសុំទោស​​អ្នកប្រើប្រាស់​ទូទាំងសកលលោក​តែម្តង៕