(ម៉ូស្គូ)៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន នៅថ្ងៃអង្គារនេះ បាននិយាយថា គ្រោះអគ្គីភ័យដែលបានឆាបឆេះផ្សារទំនើបមួយ នៅក្នុងទីក្រុងខេមែរ៉ូវ៉ូ (Kemerovo) ភាគខាងត្បូងប្រទេស និងផ្ដាច់ជីវិតមនុស្ស ៦៤នាក់ ក្នុងនោះមានកុមារជាច្រើននាក់ គឺបណ្ដាល មកពីការធ្វេសប្រហែស និងគ្មានការយកចិត្តទុកដាក់។ នេះបើតាមការចេញផ្សាយដោយ សារព័ត៌មាន CNN នៅរសៀលថ្ងៃអង្គារ ទី២៧ ខែមីនា ឆ្នាំ២០១៨។
ទន្ទឹមគ្នានៅថ្ងៃអង្គារនេះដែរ ប្រជាជនរុស្ស៊ីនៅក្នុងទីក្រុងខេមែរ៉ូវ៉ូ (Kemerovo) បានចាប់ផ្ដើមធ្វើការកាន់ទុក្ខរយៈពេលបីថ្ងៃដោយ ចាប់ផ្ដើមពីថ្ងៃអង្គារនេះតទៅ ជូនដល់ជនរងគ្រោះដែលបានស្លាប់បាត់បង់ជីវិត នៅក្នុងគ្រោះអគ្គីភ័យឆាបឆេះផ្សារទំនើប Winter Cherry កាលពីរសៀលថ្ងៃអាទិត្យ ដែលបានកើតឡើងនៅចំពេលមនុស្សម្នាជាច្រើននាក់ កំពុងសម្រុកចូលទិញសំបុត្រកុន។ «ការកាន់ទុក្ខនឹងត្រូវធ្វើឡើងរយៈពេលបីថ្ងៃ ដោយចាប់ផ្ដើមពីថ្ងៃទី២៧ រហូតដល់ថ្ងៃទី២៩ ខែមីនា ហើយទង់ជាតិរុស្ស៊ី នឹងត្រូវបង្ហូតត្រឹមពាក់កណ្ដាលដង នៅទូទាំងតំបន់ទាំងអស់ក្នុងទីក្រុងខេមែរ៉ូវ៉ូ»។ នេះបើតាមសេចក្ដីថ្លែងការណ៍ នៃរដ្ឋបាលនៅក្នុងតំបន់។
គួរបញ្ជាក់ថា បើតាមតួរលេខចុងក្រោយគិតត្រឹមថ្ងៃចន្ទ ម្សិលមិញ ជនរងគ្រោះយ៉ាងហោចណាស់ ៦៤នាក់ហើយត្រូវគេបញ្ជាក់ថា បានបាត់បង់ជីវិតនៅក្នុងហេតុការណ៍គ្រោះអគ្គីភ័យនេះ។ ចំណែកឯ មនុស្សសរុបចំនួន ៤៨នាក់ បានទទួលការព្យាបាលដោយ ១២នាក់ក្នុងចំណោមនោះកំពុងបន្តសម្រាកព្យាបាលនៅមន្ទីរពេទ្យ ក្នុងទីក្រុង Kemerovo ហើយក្នុងចំណោមជនរងគ្រោះទាំងអស់ (ទាំងស្លាប់ និងរបួស) មានកុមារជាច្រើននាក់។ បន្ថែមពីលើនេះ មនុស្ស ០៤នាក់ ក៏ត្រូវបានឃាត់ខ្លួនផងដែរ ដើម្បីរង់ចាំការសួរចម្លើយ
