(វ៉ាស៊ីនតោន)៖ តារាភាពយន្តស្រើបស្រាលអាមេរិក នាង ស្តរមី ដានីញែល (Stormy Daniels) ដែលត្រូវបានប្រព័ន្ធផ្សព្វផ្សាយអាមេរិកជាច្រើនចុះផ្សាយថា ធ្លាប់មាន ទំនាក់ទំនងផ្លូវភេទជាមួយប្រធានាធិបតីអាមេរិក លោក ដូណាល់ ត្រាំ បានបង្ហាញខ្លួនជាថ្មីនៅក្នុងបទសម្ភាសន៍មួយ ដើម្បីរៀបរាប់ពីរឿងរ៉ាវរបស់ខ្លួនតែម្តង។ នេះបើតាមការចេញផ្សាយដោយ ទីភ្នាក់ងារសារព័ត៌មានចិន ស៊ីនហួរ នៅរសៀលថ្ងៃចន្ទ ទី២៦ ខែមីនា ឆ្នាំ២០១៨។
នៅក្នុងបទសម្ភាសន៍កាលពីថ្ងៃអាទិត្យ នាង Daniels មានឈ្មោះដើម ស្ទេហ្វានី គ្លីហ្វហ្វដ (Stephanie Clifford) នៅតែអះអាងដដែលថា នាងធ្លាប់រួមដំណេកគ្នាមួយលោក ត្រាំ កាលពីខែកក្កដា ឆ្នាំ២០០៦ ប៉ុន្តែតាំងពីនោះមក អ្នកទាំងពីរមិនដែលរួមដំណេកទៀតទេ។ តារាសិចរូបនេះបន្ថែមថា នាងធ្លាប់មានអារម្មណ៍ភ័យខ្លាចពាក់ព័ន្ធ នឹងរឿងអាស្រូវនេះ កាលពីឆ្នាំ២០១១ បន្ទាប់ពីនាងបាននិយាយពីរឿងនេះ ប្រាប់សារព័ត៌មានអាមេរិកដ៏ល្បីមួយជាថ្នូរនឹងប្រាក់ ១៥,០០០ដុល្លារ។
មិនតែប៉ុណ្ណោះ នាង Daniels ក៏បានអះអាងដែរថា នាងធ្លាប់ត្រូវបានគេគំរាមកំហែងផងដែរ។ «ទុកឱ្យលោក ត្រាំ នៅម្នាក់ឯង ហើយបំភ្លេចរឿងដែលបានកើតឡើង»។ នេះជាការលើកឡើងរបស់នាង Daniels ដោយរំលឹកថា បុរសម្នាក់បានសម្លឹងមើល កូនស្រីរបស់នាង និងនិយាយយ៉ាងដូច្នេះថា «នាងជាក្មេងស្រីដ៏ស្អាតម្នាក់ ហើយវាគឺជារឿងឈឺចាប់បំផុត បើសិនជាមានរឿងអ្វីមួយកើត ឡើងលើម្ដាយរបស់នាង»។
គួរបញ្ជាក់ថា បើតាមប្រព័ន្ធផ្សព្វផ្សាយអាមេរិក នាង Daniels ធ្លាប់បានទទួលប្រាក់ ១៣០,០០០ដុល្លារ ក្នុងមួយសប្ដាហ៍ មុននឹងការបោះឆ្នោតប្រធានាធិបតីអាមេរិក កាលពីឆ្នាំ២០១៦ ចូលមកដល់ ជាថ្នូរនឹងការបិទមាត់មិនគាស់កកាយរឿងអាស្រូវជាមួយ លោកត្រាំ។ ប៉ុន្តែមេធាវីរបស់ប្រធានាធិបតីអាមេរិករូបនេះ បានបដិសេធថា លោក ត្រាំ មិនដែលមានទំនាក់ទំនងជាមួយនាង Stormy Daniels នោះទេ៕
