(ម៉ូស្គូ)៖ ក្រុមហ៊ុនផលិតប្រេងឥន្ទនៈឈ្មោះថា TVEL របស់រដ្ឋាភិបាលរុស្ស៊ី កំពុងរៀបចំដាក់ចេញឥន្ទនៈប្រភេទថ្មីរបស់ខ្លួន ដែលសម្រាប់ប្រើប្រាស់ក្នុងស្ថានីយថាមពលនុយក្លេអ៊ែរ ទៅកាន់ទីផ្សារ។ នេះបើតាមការចេញផ្សាយដោយ សារព័ត៌មានរុស្ស៊ី Sputnik នៅរសៀលថ្ងៃចន្ទ ទី២៦ ខែមីនា ឆ្នាំ២០១៨។
លោកស្រី ណាតាលៀ នីគីប៉េឡូវ៉ា (Natalia Nikipelova) ដែលជាអគ្គនាយកក្រុមហ៊ុន TVEL បានឲ្យដឹងថា ក្រុមហ៊ុនរបស់លោកស្រី កំពុងអភិវឌ្ឍន៍ប្រេងឥន្ទនៈប្រភេទថ្មីមួយចំនួន ហើយក្នុងចំណោមនោះមានប្រភេទឥន្ទនៈ ដែលគេហៅថា Accident Tolerant Fuel ជាប្រេងឥន្ទនៈជំនាន់ថ្មី ប្រើប្រាស់ដើម្បីជួយឲ្យស្ថានីយថាមពលមិនត្រូការចំណាយថវិកាច្រើនដូចមុន ដើម្បីមើលថែទាំ និងមិនងាយនឹងជួបឧបទ្ទវហេតុថែមទៀត។
លោកស្រី Nikipelova បានបង្ហាញជំនឿចិត្តថា ប្រេងឥន្ទនៈនេះ នឹងអាចត្រូវនាំយកទៅប្រកួតប្រជែងក្នុងទីផ្សារ នៅចុងឆ្នាំ២០១៩។ បើតាមលោកស្រី Nikipelova អតិថិជនមួយចំនួននៅសហរដ្ឋអាមេរិក ក៏បានបង្ហាញចំណាប់អារម្មណ៍របស់ពួកគេរួចស្រេចទៅហើយ មកលើប្រេងឥន្ទនៈនេះ៕
