(ម៉ូស្គូ)៖​ បណ្ដាញទំនាក់ទំនង​សង្គមរុស្ស៊ី Telegram បានអះអាងថា ក្នុងរយៈពេល ៣០ថ្ងៃ ចុងក្រោយនេះ អ្នកប្រើប្រាស់ជាប្រចាំរបស់ខ្លួន (ដោនឡូកកម្មវិធីនេះ យកមក​ប្រើប្រាស់) ​​បានកើន​ឡើងដល់ ២០០,០០០,០០០នាក់ ហើយដែល​តួលេខនេះ​ ស្មើនឹងចំនួនប្រជាជន​ច្រើនជាងគេបំផុត​លំដាប់ទី ៦ បើសិនជា Telegram ជាប្រទេស​មួយ។ នេះបើតាម​ការ​ប្រកាសព័ត៌មាន​ ដោយផ្ទាល់​ដល់អតិថិជន​ទូទៅ របស់បណ្តាញ​សង្គម​ដ៏ពេញនិយម លើលោកមួយ​នេះ នៅព្រឹកថ្ងៃចន្ទ ទី២៦ ខែមីនា ឆ្នាំ២០១៨។

ថ្លែងនៅ​លើគេហទំព័រ​របស់ខ្លួន Telegram បានលើក​ឡើងយ៉ាងដូច្នេះថា «យើងមានអ្នកប្រើប្រាស់​រហូតដល់ ២០០លាននាក់ ពីព្រោះ​អ្នកទំាងអស់គ្នា​បានប្រាប់​មិត្តភក្តិពួកគេ ​ឱ្យចូលរួមប្រើប្រាស់បណ្ដាញ​ទំនាក់ទំនងសង្គម​របស់យើង... អ្នកប្រើប្រាស់​តែងតែជា ​អាទិភាពរបស់​យើង»។

បណ្ដាញទំនាក់​ទំនង​សង្គមរុស្ស៊ី​មួយនេះ​បន្ថែម ខណៈ Facebook ​កំពុងប្រឈមមុខ​នឹងវិបត្តិលេចធ្លាយ​ទិន្នន័យ​ផ្ទាល់ខ្លួន របស់អ្នក​ប្រើប្រាស់​ទៀតថា «Telegram មិនមានម្ចាស់​ភាគហ៊ុន ឬអ្នកផ្សព្វផ្សាយ​ពាណិជ្ជកម្ម​ត្រូវរាយការណ៍​នោះទេ ហើយមិន តែប៉ុណ្ណោះ យើងក៏មិនបាន​ចុះកិច្ចព្រមព្រៀង​ជាមួយអ្នកទីផ្សារណា ឬក៏ទីភ្នាក់ងារ​រដ្ឋាភិបាលណា​មួយដែរ។ ដូច្នេះហើយ​តាំងពី​យើងបង្កើត Telegram​ កាលពីឆ្នាំ២០១៣​មក យើងមិនដែល​ធ្វើឱ្យទិន្នន័យ​ឯកជន របស់អ្នកប្រើប្រាស់​លេចធ្លាយទៅ​ដល់ដៃជន ទីបីសូម្បី​តែមួយ byte ក៏​ដោយ»។

គួរបញ្ជាក់ថា Telegram​ គឺជាសេវាកម្មផ្ញើសារមួយដោយ​មិនយកប្រាក់កំរៃ ដែលអ្នកអាចរក​បាននៅលើ App Store ​ឬ Play Store និង Windows។ បណ្ដាញទំនាក់​ទំនងសង្គមមួយនេះ ត្រូវបានបង្កើត​ឡើងកាលពី​ខែសីហា ឆ្នាំ២០១៣ ដោយស្ថាបនិក​ជនជាតិរុស្ស៊ី លោក ផាវែល ឌួរ៉ូវ (Pavel Durov)។ បើតាមតួលេខ​កាលពីខែធ្នូ ឆ្នាំ២០១៧ អ្នកប្រើប្រាស់ Telegram ទូទាំងពិភពលោកសរុបមាន​ចំនួន ១៨០លាននាក់៕