(ម៉ូស្គូ)៖ អតីតរដ្ឋមន្ត្រី​ការពារជាតិ​អ៊ីស្រាអែល លោក សាអ៊ុល ម៉ូហ្វាស (Shaul Mofaz) ​បានបង្ហើប​អាថ៌បំាងមួយថា អនាគតទីប្រឹក្សា​សន្តិសុខជាតិ​អាមេរិក​ថ្មី លោក ចន បូលតុន (John Bolton) ធ្លាប់បានព្យាយាម​បញ្ចុះបញ្ចូល​ឱ្យអ៊ីស្រាអែល​ ប្រើប្រាស់​កម្លាំងយោធា​​វាយប្រហារ លើអ៊ីរ៉ង់ មុននឹង​ទីក្រុងតេហេរ៉ង់ ផលិតបាន​អាវុធ​នុយក្លេអ៊ែរ។ នេះបើតាម​ការចេញផ្សាយ​ដោយ សារព័ត៌មាន Russian Today នៅព្រឹកថ្ងៃចន្ទ ទី២៦ ខែមីនា ឆ្នាំ២០១៨។

លោក Shaul Mofaz ថ្លែងបែបនេះ​ នៅក្នុងជំនួបជា​មួយអតីតប្រមុខ​ការពារជាតិអ៊ីស្រាអែល​ នាពេលថ្មីៗ​នេះ។ ថ្លែងនាឱកាស​នោះ ដែរ លោក Mofaz បានគូស​បញ្ជាក់យ៉ាងដូច្នេះថា «ខ្ញុំបានស្គាល់​លោក ចន បូលតុន តាំងតែពី​គាត់កាន់តំណែង​ជាអគ្គរដ្ឋទូត​អាមេរិក ប្រចាំអង្គការ​សហប្រជាជាតិ (២០០៥-​២០០៦) មកម្លេះ។ គាត់ធ្លាប់បាន​ព្យាយាមបញ្ចុះបញ្ចូល​ខ្ញុំថា អ៊ីស្រាអែលគួរ​តែ​វាយប្រហារ លើអ៊ីរ៉ង់​ជាមុន»។ តែទោះជាយ៉ាង​នេះក្ដី អតីតរដ្ឋមន្ត្រីការពារជាតិ​អ៊ីសា្រអែល​រូបនេះ អះអាងថា នៅពេលនោះ​លោកជឿ​ជាក់ថា ការប្រើប្រាស់​ជម្រើសយោធា​ មិនអាចមែន​ជាការសម្រេច​ចិត្តដ៏ល្អ សម្រាប់​សហរដ្ឋអាមេរិក និងអ៊ីរ៉ង់​នោះទេ។

គួរបញ្ជាក់ថា លោក ចន បូលតុន ត្រូវបាន​គេរំពឹងថា នឹងឡើង​កាន់តំណែងជា ទីប្រឹក្សាសន្តិសុខជាតិ​អាមេរិក ជំនួស​លោក H.R. McMaster នៅថ្ងៃទី០៩ ខែមេសា ខាងមុខនេះ ពោលគឺតែ​ប៉ុន្មានថ្ងៃ​ប៉ុណ្ណោះ ក្រោយ​នាយក CIA​ លោក ម៉ៃក៍ ប៉ុមផេអូ (Mike Pompeo) ឡើងកាន់តំណែង​ជារដ្ឋមន្ត្រីការបរទេស​អាមេរិក ជំនួសលោក រិច ធីល្លឺសុន។ ប៉ុន្តែទន្ទឹមគ្នា ក្រុមអ្នកជំនាញ និងអ្នកនយោបាយ​អាមេរិក ខ្លះយល់ថា ការតែងតាំង​អ្នកទាំងពីរ​នាក់នេះ ហាក់ដូច​ជាបង្ហាញថា លោក ត្រាំ បានត្រៀមខ្លួន​រួចជាស្រេច​សម្រាប់​សង្រ្គាម៕