(សេអ៊ូល)៖ ការដែលកូរ៉េខាងជើង​ យល់ព្រមចរចា​ជាមួយសហរដ្ឋអាមេរិក គឺគ្រាន់តែល្បិច​បង្វែរការចាប់អារម្មណ៍ និងកេងចំណេញ​ពេល វេលាក្នុងការ​អភិវឌ្ឍ​អាវុធនុយក្លេអ៊ែរ​របស់ខ្លួនតែ​​ប៉ុណ្ណោះ។ នេះគឺជាការ​លើកឡើង​របស់អនាគត​ទីប្រឹក្សាសន្តិសុខជាតិ​អាមេរិកថ្មី លោក ចន បូលតុន (John Bolton) ដកស្រង់ដោយ ទីភ្នាក់ងារសារព័ត៌មាន​ យ៉ុនហាប់ នៅព្រឹកថ្ងៃចន្ទ ទី២៦ ខែមីនា ឆ្នាំ២០១៨។

លោក John Bolton ជាអតីតអគ្គរដ្ឋទូត​អាមេរិក​ ប្រចាំអង្គការ​សហប្រជាជាតិ ត្រូវបានលោក ដូណាល់ ត្រាំ តែងតាំង​ជាទីប្រឹក្សា​សន្តិសុខជាតិថ្មី កាលពី​សប្ដាហ៍មុន ខណៈលោក ត្រាំ ផ្ទាល់កំពុង​ត្រៀមខ្លួន​ជួបជាមួយ​ មេដឹកនាំ​កូរ៉េខាងជើង លោក គីម ជុងអ៊ុន នៅចុង ខែឧសភា​ខាងមុខនេះ បើសិនជាគ្មាន​អ្វីប្រែប្រួលទេ​នោះ។

ដោយឡែក ជុំវិញសំណុំរឿងកូរ៉េខាងជើងនេះដែរ ថ្លែងនៅក្នុងបទសម្ភាសន៍ ជាមួយប្រព័ន្ធផ្សព្វផ្សាយអាមេរិក លោក Bolton បានអះអាងថា កូរ៉េខាងជើងយល់ព្រមចរចាជាមួយសហរដ្ឋអាមេរិក គឺគ្រាន់តែ ដើម្បីបង្វែរការចាប់អារម្មណ៍ ដើម្បីអភិវឌ្ឍអាវុធនុយក្លេអ៊ែររបស់ខ្លួនតែប៉ុណ្ណោះ។

លោក Bolton បានលើកឡើង​នៅក្នុងបទសម្ភាសន៍​ កាលពីថ្ងៃអាទិត្យយ៉ាងដូច្នេះថា «ខ្ញុំគិតថាយើងគួរតែ​គិតគូរ​ឱ្យបានលម្អិត ​ចំពោះ​ចេតនាពិត​របស់កូរ៉េខាងជើង... សម្រាប់ខ្ញុំ​ពួកគេកំពុងត្រូវការ​ជាចំាបាច់​ គឺធ្វើយ៉ាងណាឱ្យក្បាល​គ្រាប់នុយក្លេអ៊ែរ​របស់ពួកគេអាច បាញ់ដល់​សហរដ្ឋអាមេរិក។ ដូច្នេះខ្ញុំយល់ថា ពួកគេកំពុងកេង​ចំណេញពេលវេលា​ ដើម្បីអភិវឌ្ឍន៍អាវុធ​នុយក្លេអ៊េរ ដូចដែល​ពួកគេ​ធ្លាប់បាន​ធ្វើកាលពី ២៥ឆ្នាំ មុនតែ​ប៉ុណ្ណោះ»។

គួរបញ្ជាក់ថា លោក John Bolton ដែលស្គាល់យ៉ាង​ច្បាស់ថា ជាអ្នកគំាទ្រ​ការប្រើប្រាស់​កម្លាំងយោធា ប្រឆំាងនឹងកូរ៉េខាងជើង ត្រូវបានគេ​រំពឹងថា នឹងឡើង​កាន់តំណែង​ជា​ទីប្រឹក្សា​សន្តិសុខជាតិ​អាមេរិក ជំនួសលោក ម៉ាកម៉ាស្ទឺរ (H.R. McMaster) ជាផ្លូវការ​នៅថ្ងៃទី០៩ ខែមេសា ខាងមុខនេះ៕