(ពិភពលោក)៖ នៅថ្ងៃសៅរ៍ ទី២៤ ខែមីនា ឆ្នាំ២០១៨នេះ ព្រឹត្តិការណ៍អន្តរជាតិសំខាន់ៗ ជាច្រើនបានកើតឡើង រួមមានទាំងព្រឹត្តិការណ៍នយោបាយ និងស្ថានការណ៍ទូទាំងសកលលោកដ៏គួរឲ្យចាប់អារម្មណ៍ជាច្រើន។ ដូច្នេះបើចង់ដឹងថា តើព្រឹត្តិការណ៍រូបភាពប្រចាំថ្ងៃនេះមានអ្វីខ្លះនោះ សូមទស្សនាដូចខាងក្រោម៖
១៖ ក្នុងចំណោមត្រីបាឡែនប្រមាណជាង១៥០ក្បាល ដែលត្រូវគេប្រទះឃើញមកនៅទើលើឆ្នេរសមុទ្រ ភាគខាងលិចប្រទេសអូស្រ្តាលី មានតែ០៦ក្បាលប៉ុណ្ណោះ ដែលត្រូវបានគេជួយសង្រ្គោះឲ្យនៅរស់រានមានជីវិត។
២៖ កូរ៉េខាងជើង ព្រមបើកកិច្ចប្រជុំជាន់ខ្ពស់ ជាមួយកូរ៉េខាងត្បូង នៅថ្ងៃទី២៩ ខែមីនា ខាងមុខនេះ ដើម្បីពិភាក្សារឿងបើកកិច្ចប្រជុំកំពូលអន្តរកូរ៉េ ដែលនឹងប្រព្រឹត្តទៅនាចុងខែក្រោយ។
៣៖ ក្រុមហ៊ុនយក្ស Boeing លក់យន្តហោះទំនើបថ្មីពីរគ្រឿងឲ្យជប៉ុន ក្នុងតម្លៃ៦៧៨លានដុល្លារ។
៤៖ ស្ថាបនិកក្រុមហ៊ុន SpaceX និង Tesla លុប Page ផ្លូវការរបស់ក្រុមហ៊ុនទាំងពីរនេះ ចេញពី Facebook ខណៈដែលបណ្តាញសង្គមយក្សនេះ កំពុងទទួលរងការរិះគន់ខ្លាំង រឿងបណ្តោយឲ្យបែកធ្លាយទិន្នអ្នកប្រើប្រាស់ប្រមាណ០៥លាននាក់។
៥៖ ប៉ូលិសប្រឆាំងភេវរកម្មបារាំងម្នាក់ ដែលបានពលីប្តូរធ្វើជាចំណាប់ខ្មាំងជំនួសស្រ្តីជាជនរងគ្រោះម្នាក់នោះ បានទទួលមរណភាពហើយ ក្រោយពីត្រូវខ្មាន់កាំភ្លើងជាអ្នកគាំទ្រក្រុមភេរវករ ISIS បាញ់ឲ្យរបួសជាទម្ងន់កាលពីម្សិលមិញ។
៦៖ ប្រធានាធិបតីអាមេរិក លោក ដូណាល់ ត្រាំ ចាប់ផ្តើមរករឿងដាក់សម្ពាធមិនឲ្យបុគ្គលកែភេទ និងភេទទីបី បម្រើការងារនៅក្នុងជួរកងទ័ព។
៧៖ លោកយាយម្នាក់នៅប្រទេសជប៉ុន ទទួលបានសញ្ញាបត្រថ្នាក់បណ្ឌិត ក្នុងវ័យ៨៨ឆ្នាំ។
