(ប៉េកាំង)៖ ទិដ្ឋភាពពាណិជ្ជកម្មកាន់តែបង្ហាញយ៉ាងច្បាស់ ពីនយោបាយគាំពារនិយមរបស់អាមេរិក តាមរយៈការបង្កើនថ្លៃពន្ធនាំចូលដែក-អាលុយមីញ៉ូម ពីបណ្តាប្រទេសដែលមិនមែនជាសម្ព័ន្ធមិត្តខ្លួន ហើយប្រទេសចិន គឺស្ថិតនៅចំប្លង់ នៃការបង្កើនថ្លៃពន្ធដែក-អាលុយមីញ៉ូមនេះតែម្តង ប៉ុន្តែទោះបីជាបែបនេះក្តី ទីក្រុងប៉េកាំងអះអាងថា «ចិនត្រៀមខ្លួនរួចជាស្រេច» ដើម្បីទប់ទល់នឹងរបត់ពាណិជ្ជកម្មអាមេរិក ហើយនឹងការពារផលប្រយោជន៍ខ្លួនឯងឲ្យបាន។ នេះបើតាមការចេញផ្សាយដោយ ទីភ្នាក់ងារព័ត៌មាន Channel News Asia នារសៀលថ្ងៃសៅរ៍ ទី២៤ ខែមីនា ឆ្នាំ២០១៨។
ការលើកឡើងខាងលើនេះ ធ្វើឡើងដោយឧបនាយករដ្ឋមន្ត្រីចិន លោក លូ ហ៊ី (Liu He) ប្រាប់ទៅកាន់រដ្ឋមន្ត្រីរតនាគារជាតិអាមេរិក លោក ស្ទេវិន ម៉ានូឈីន (Steven Mnuchin) ឆ្លើយតបទៅនឹងផែនការនានារបស់ លោក ដូណាល់ ត្រាំ ប្រធានាធិបតីអាមេរិក ក្នុងការបង្កើនថ្លៃពន្ធ ៦០ពាន់លានដុល្លារ សម្រាប់ទំនិញរបស់ប្រទេសចិន ចូលទៅកាន់សហរដ្ឋអាមេរិក ក្នុងនោះមានដែក និងអាលុយមីញ៉ូម ជាចម្បងតែម្តង។
ហេតុដែលមានការចោទថា សហរដ្ឋអាមេរិក កំពុងដើរនយោបាយបែបគាំពារនិយមនេះ គឺដោយសារតែ ប្រធានាធិបតីអាមេរិក លោក ដូណាល់ ត្រាំ បានអនុម័តលើការផ្អាកជាបណ្ដោះអាសន្ន នូវការតម្លើងពន្ធនាំចូលលើ អាលុយមីញ៉ូម និងដែក ពីសហភាពអឺរ៉ុប និងបណ្ដាប្រទេសដទៃទៀតចំនួន ០៦ ដែលសុទ្ធសឹងជាសម្ព័ន្ធមិត្តធំៗរបស់អាមេរិក ប៉ុន្តែប្រទេសដទៃទៀតរួមទាំងចិន គឺគេចមិនផុតនោះឡើយ។
សេតវិមាននៅក្នុងសេចក្ដីថ្លែងការណ៍របស់ខ្លួនកាលពី ថ្ងៃព្រហស្បតិ៍សប្តាហ៍នេះ បានឱ្យដឹងថា ការតម្លើងពន្ធនាំលើអាលុយមីញ៉ូ និងដែកពី ប្រទេសជាសមាជិកសហភាពអឺរ៉ុប អាហ្សង់ទីន អូស្រ្ដាលី កាណាដា ប្រេស៊ីល ម៉ិចស៊ីកូ និងកូរ៉េខាងត្បូង ត្រូវបានផ្អាកជាបណ្ដោះ អាសន្នរហូតដល់ថ្ងៃទី០១ ខែឧសភា ឆ្នាំ២០១៨។ «ប្រទេសទាំងនេះមានទំនាក់ទំនងសន្តិសុខ ដ៏សំខាន់ជាមួយសហរដ្ឋអាមេរិក»។ នេះបើតាមការលើកឡើងរបស់ លោក ដូណាល់ ត្រាំ។
គួរបញ្ជាក់ថា បើតាមសេតវិមាន ការផ្អាកនេះត្រូវបានធ្វើឡើងដោយឈរលើមូលដ្ឋានកំពុងស្ថិតក្រោមកិច្ចចរចា ហើយលោក ត្រាំ កំពុងសម្រេចចិត្តថា តើត្រូវបន្តលើកលែងការតម្លើងពន្ធនេះ ឬក៏យ៉ាងណា នៅក្រោយការផ្អាកនេះអស់សុពលភាព៕
