(សេអ៊ូល)៖ កូរ៉េខាងជើង​បានព្រមទទួលយល់​ព្រម ចំពោះសំណើរបស់​កូរ៉េខាងត្បូង ដែលបានស្នើ​ឲ្យបើកកិច្ចប្រជុំ​ជាន់ខ្ពស់មួយ នៅថ្ងៃទី​២៩ ខែមីនានេះ ដើម្បីពិភាក្សាគ្នា​អំពីកាលបរិច្ឆេទ​ និងរបៀបវារៈ​សំខាន់ៗ សម្រាប់កិច្ច​ប្រជុំកំពូល​អន្តរកូរ៉េ ដែលគ្រោង​នឹងប្រព្រឹត្តទៅ​ នាអំឡុង​ចុង​​ខែមេសា​ខាងមុខ។ នេះបើតាម​ការបញ្ជាក់ពី​ក្រសួងបង្រួបបង្រួមជាតិ​ នៃប្រទេស​កូរ៉េខាងត្បូង ដកស្រង់ដោយ​ ទីភ្នាក់ងារព័ត៌មាន​កូរ៉េខាង​ត្បូង​ យុនហ៉ាប់ នៅព្រឹក​ថ្ងៃសៅរ៍ ទី២៤ ខែមីនា ឆ្នាំ២០១៨។

កាលពីថ្ងៃព្រហស្បតិ៍​សប្តាហ៍នេះ ទីក្រុងសេអ៊ូល​បានជូនដំណឹងដល់​ទីក្រុងព្យុងយ៉ាង តាមរយៈបណ្តាញ​ទំនាក់ទំនង​ឆ្លងព្រំដែន អំពីសំណើ​​របស់ខ្លួន ក្នុងការបើកកិច្ចជួប​ពិភាក្សា នាថ្ងៃព្រហស្បតិ៍សប្តាហ៍ក្រោយ នៅអគារខាង​កូរ៉េខាងជើង ក្នុងភូមិ ផាន់ម៉ុនចុម (Panmunjom) ដែលខណ្ឌចែក​​ឧប​ទ្វីបកូរ៉េ ដោយក្នុងសំណើនោះ​ទីក្រុងសេអ៊ូលបាន​លើកឡើងថា គណៈប្រតិភូ​មួយក្រុមមាន​សមាជិកបីរូប នឹងត្រូវដឹកនាំ​ដោយរដ្ឋមន្រ្តី​​បង្រួប​បង្រួមជាតិ លោក ចូ ម្យាំងក្យុន (Cho Myoung-gyon)។

គួរជម្រាបថា ប្រធានាធិបតី​កូរ៉េខាងត្បូង លោក មូន ជែអ៊ីន និងប្រមុខដឹកនាំ​កំពូលកូរ៉េខាងជើង លោក គីម ជុងអ៊ុន បានគ្រោង​នឹងបើក​កិច្ច​ប្រជុំកំពូលមួយ​នៅចុងខែមេសា​ខាងមុខ ដែលវានឹងក្លាយ​ជាជំនួបកំពូលលើកទីបី​ រវាងប្រទេសទាំងពីរ បន្ទាប់ពីកិច្ចប្រជុំកំពូល​ឆ្នាំ២០០០ និង​ឆ្នាំ២០០៧៕​