(ម៉ូស្គូ)​៖​ ឯកអគ្គរាជទូតរុស្ស៊ីប្រចាំចក្រភពអង់គ្លេសបានអះអាងនាថ្ងៃព្រហស្បតិ៍នេះថា​ អ្នកគាំទ្របាល់ទាត់អង់គ្លេស នឹងមានសុវត្ថិភាពនៅក្នុងព្រឹត្តិការណ៍ World Cup 2018​នេះ​ បើទោះបីជាមានវិបត្តិផ្នែកការទូតរវាងរដ្ឋាភិបាល​ក្រុងឡុងដ៍​ និងម៉ូស្គូក្តី​ នេះបើយោងតាមសារព័ត៌មាន​ AP​ ចេញផ្សាយនាថ្ងៃទី២២​ ខែមីនា​ ឆ្នាំ២០១៨នេះ។

«អ្នកគាំទ្រទាំងនោះនឹងមានសុវត្ថិភាព​ នៅក្នុងប្រទេសរុស្ស៊ី» នេះជាការអះអាងរបស់លោក​ Alexander Yakovenko ក្នុងសន្និសីទសារព័ត៌មានមួយនៅ ឯស្ថានទូតទីក្រុងឡុងដ៍។

វិធានការណ៍ចាំបាច់នានា​ ត្រូវបានអនុវត្ត​ ស្របពេលដែលអាជ្ញាធរពិសេសរបស់អង់គ្លេស​ បានចងទំនាក់ទំនងជាមួយអាជ្ញាធរពិសេស របស់រុស្ស៊ីដើម្បីរក្សាសន្តិសុខជូនពួកគេ។

ការប្រុងប្រយ័ត្ន​ដើម្បីរក្សាសន្តិសុខ ជាអ្វីដែលយើងធ្វើឡើងសម្រាប់គ្រប់ប្រទេសនីមួយៗ​។ «ខ្ញុំជឿជាក់ថានឹងមានសន្តិសុខពេញលេញ មិនតែប៉ុណ្ណោះថែមទាំងមាន គោលការណ៍ លើកលែងទិដ្ឋាការសម្រាប់អ្នកដែលចង់មកទស្សនាទីក្រុងម៉ូស្គូផងដែរ»៕

លោក Alexander Yakovenko នៅក្នុងសន្និសីទសារព័ត៌មាន នាស្ថានទូតរុស្ស៊ី ប្រចាំប្រចាំចក្រភពអង់គ្លេស