(ពិភពលោក)៖ នៅថ្ងៃព្រហស្បតិ៍ ទី២២ ខែមីនា ឆ្នាំ២០១៨នេះ ព្រឹត្តិការណ៍អន្តរជាតិសំខាន់ៗ ជាច្រើនបានកើតឡើង រួមមានទាំងព្រឹត្តិការណ៍នយោបាយ និងស្ថានការណ៍ទូទាំងសកលលោកដ៏គួរឲ្យចាប់អារម្មណ៍ជាច្រើន។ ដូច្នេះបើចង់ដឹងថាតើព្រឹត្តិការណ៍រូបភាពប្រចាំថ្ងៃនេះមានអ្វីខ្លះនោះសូមទស្សនាដូចខាងក្រោម៖
១៖ ចំនួនកម្ទេចកម្ទីប្លាស្ទិក នៅតាមមហាសមុទ្រនានាទូទាំងពិភពលោក ត្រូវគេរំពឹងថា នឹងកើនឡើងបីដងលើសពីបរិមាណបច្ចុប្បន្ន នៅក្នុងអំឡុងពេល០១មួយទសវត្សរ៍ទៀត ប្រសិនបើដល់ថ្ងៃខាងមុខ នៅតែពុំមានវិធានការតឹងរ៉ឹង ដើម្បីដោះស្រាយបញ្ហាចោលសំរាមទេនោះ៕
២៖ ប្រធានាធិបតីប៉េរូ លោក ផេដ្រូ ផាប្លូ គូកស៊ីនស្គី (Pedro Pablo Kuczynski) បានដាក់លិខិតលាលែងពីមុខតំណែងតែម្តង នាថ្ងៃពុធសប្តាហ៍នេះ (ម៉ោងក្នុងប្រទេសប៉េរូ) ពោលគឺនៅមុនមួយថ្ងៃ នៃការប្រព្រឹត្តទៅនូវដំណើរការបោះឆ្នោតរបស់សភាប៉េរូ ដើម្បីសម្រេចថា នឹងទម្លាក់រូបលោកពីអំណាចដែរ ឬក៏អត់នោះ៕
៣៖ ប្រធានាធិបតីហ្វីលីពីន លោក រ៉ូឌ្រីហ្គោ ឌូតឺតេ បានអះអាងជាថ្មីម្ដងទៀតថា លោកនឹងមិនអនុញ្ញាតឱ្យហ្វីលីពីន ចូលរួមក្នុងសង្រ្គាម ដែលដឹកនាំដោយសហរដ្ឋអាមេរិកឡើយ ព្រោះវាគ្មានផ្ដល់ផលអ្វីដល់ហ្វីលីពីន ក្រៅតែពីអំពើឃោឃៅ និងការឈឺចាប់៕
៤៖ សមាជិកសភានៃគណបក្សទាំងពីរ របស់សហរដ្ឋអាមេរិក បានប្រកាសឲ្យដឹងថា ពួកគេបានឈានដល់កិច្ចព្រមព្រៀងមួយ ដើម្បីផ្តល់កញ្ចប់ថវិកាដល់រដ្ឋាភិបាលសហព័ន្ធ សម្រាប់រយៈពេល ០៦ខែទៀត ពោលគឺដល់ផុតឆ្នាំសារពើពន្ធ ឆ្នាំ២០១៨នេះ នៅប៉ុន្មានថ្ងៃមុនពេលកំណត់ នៃការត្រូវបិទទ្វាររដ្ឋាភិបាលជាថ្មីម្តងទៀត៕
៥៖ ស្ថាបនិក Facebook លោក ម៉ាក ហ្សាក់កឺប៊ឺក (Mark Zuckerberg) បានទទួលស្គាល់ថា បណ្ដាញសង្គមរបស់លោកបានបង្កើត កំហុសដោយបណ្ដោយឱ្យទិន្នន័យអ្នកប្រើប្រាស់រាប់លាននាក់ ត្រូវបានក្រុមហ៊ុនប្រឹក្សានយោបាយមួយ យកទៅប្រើប្រាស់ក្នុងចេតនានយោបាយ។ ប៉ុន្តែ ស្ថាបនិករូបនេះ ក៏បានសន្យាផងដែរថា នឹងការពារទិន្នន័យអ្នកលេង Facebook ហើយលោករីករាយក្នុងការផ្តល់សក្ខីកម្ម ចំពោះមុខសភាអាមេរិកផងដែរ៕
៦៖ អង្គការសហប្រជាជាតិនៅថ្ងៃព្រហស្បតិ៍នេះ បានឱ្យដឹងថា អាកាសធាតុក្ដៅជាប់កំណត់ត្រាកាលពីបីឆ្នាំមុន និងរលក កម្ដៅនៅក្នុងប្រទេសអូស្ត្រាលី រួមទាំងការរលាយផ្ទាំងទឹកកកអាក់ទិច និងកង្វះខាតទឹកនៅអាហ្វ្រិកខាងត្បូង បាននិងកំពុងធ្វើឱ្យ អាកាសធាតុក្នុងឆ្នាំ២០១៨ នេះកាន់តែអាក្រក់ឡើង៕
