(ប៉ារីស)៖ អតីតប្រធានាធិបតីបារាំង លោក នីកូឡាស សាកូស៊ី (Nicolas Sarkozy) បានប្រាប់ចៅក្រមដែលដាក់រូបលោកឱ្យនៅ ក្រោមការស៊ើបអង្កេតជាផ្លូវការថា ការចោទប្រកាន់មកលើរូបលោកថា បានទទួលមូលនិធិខុសច្បាប់ ពីអតីតមេដឹកនាំលីប៊ី លោក មួអាម៉ា ហ្គាហ្វី (Muammar Gaddafi) គឺជារឿងកុហក ដែលធ្វើឱ្យជីវិតធ្លាក់ចូលនរក។ នេះបើតាមការចេញផ្សាយដោយសារ ព័ត៌មានបារាំង Le Figaro នៅល្ងាចថ្ងៃព្រហស្បតិ៍ ទី២២ ខែមីនា ឆ្នាំ២០១៨។
លោក សាកូស៊ី តាមរយៈការស្រង់សម្ដីពីកាសែតបារាំង Le Figaro បានគូសបញ្ជាក់យ៉ាងខ្លីដូច្នេះថា «វាគឺរឿងកុហកដែលបាន ធ្វើឱ្យជីវិតរបស់ខ្ញុំ ដូចជារស់នៅក្នុងឋាននរក ចាប់តាំងពីថ្ងៃទី១១ ខែមីនា ឆ្នាំ២០១១មក»។ ការថ្លែងរបស់អតីតប្រធានាធិបតីបារាំងវ័យ ៦៣ឆ្នាំរូបនេះ កើតមានឡើងខណៈក្រុមរដ្ឋអាជ្ញាបារាំង កំពុងស៊ើបអង្កេតលើការចោទប្រកាន់ថា ក្រុមយុទ្ធនាឃោសនា បោះឆ្នោតរបស់លោក បានទទួលប្រាក់រាប់លានអឺរ៉ូ ពីអតីតមេដឹកនាំលីប៊ី លោក ហ្គាហ្វី យកមកប្រើប្រាស់ដើម្បីទ្រទ្រង់យុទ្ធនាការឃោសនា បោះឆ្នោតប្រធានាធិបតីបារាំងកាលពីឆ្នាំ២០០៧។
សូមជំរាបថា អតីតប្រធានាធិបតីបារាំង លោក នីកូឡាស សាកូស៊ី ត្រូវបានប៉ូលិសបញ្ជូនខ្លួនទៅសាកសួរហើយ កាលពីថ្ងៃអង្គារ ហើយនេះជាការបង្ហាញខ្លួនសាជាថ្មីលើកដំបូងចំពោះមុខច្បាប់ដោយ លោក សាកូស៊ី ដើម្បីទទួលការសាកសួរ និងស៊ើបអង្កេតឲ្យដឹងថា លោកពិតជាបានទទួលជំនួយពីមេដឹកនាំលីប៊ី លោក មួអាម៉ា ហ្គាហ្វី មែនដែរ ឬទេ កាលពីយុទ្ធនាការបោះឆ្នោត ឆ្នាំ២០០៧ ដែលកាលណោះលោកជាអ្នកឈ្នះ និងបានក្លាយជាប្រធានាធិបតីបារាំងនោះ៕
