(វ៉ាស៊ីនតោន)៖ ស្ថាបនិក Facebook​ លោក ម៉ាក ហ្សាក់កឺប៊ឺក (Mark Zuckerberg) បានទទួល​ស្គាល់ថា បណ្ដាញសង្គម​របស់លោកបាន​បង្កើត កំហុសដោយ​បណ្ដោយឱ្យទិន្នន័យ​អ្នកប្រើប្រាស់​រាប់លាននាក់ ត្រូវបាន​ក្រុមហ៊ុនប្រឹក្សា​នយោបាយមួយ ​យកទៅ​ប្រើប្រាស់ក្នុង​ចេតនា​នយោបាយ។ ប៉ុន្តែ ស្ថាបនិក​រូបនេះ ក៏បានសន្យា​ផងដែរ​ថា នឹងការពារទិន្នន័យ​អ្នកលេង Facebook ហើយលោករីករាយក្នុងការផ្តល់សក្ខីកម្ម ចំពោះមុខ​សភាអាមេរិក​ផងដែរ។ នេះបើ​តាមការ ចេញ​ផ្សាយ​ដោយ​សារព័ត៌មាន BBC នៅព្រឹកថ្ងៃព្រហស្បតិ៍ ទី២២ ខែមីនា ឆ្នាំ២០១៨។

លោក Zuckerberg ថ្លែងបែបនេះ​បន្ទាប់ពីមាន​សេចក្ដីរាយការណ៍ គណៈកម្មការ​​សហព័ន្ធ​ពាណិជ្ជកម្ម​អាមេរិក​ បានបើក​ការស៊ើប​អង្កេត​មួយលើ​​ក្រុមហ៊ុន Facebook​ សម្រាប់​ការចោទ​​ប្រកាន់ថា ព័ត៌មានឯកជន​របស់អ្នក​ប្រើប្រាស់​​ជាង ៥០លាននាក់ ត្រូវគេយ​ក​ទៅប្រើដើម្បី ជះឥទ្ធិពល​ដល់​ការបោះឆ្នោត​ប្រធានាធិបតី​​អាមេរិក​ កាលពី​ឆ្នាំ២០១៦។

ភាពចម្រូងចម្រាស​​បានកើតឡើង​​ក្រោយ ក្រុមហ៊ុន Cambridge Analytica (CA) ដែលជួលដោយ​​ក្រុមយុទ្ធនាការ​​ឃោសនា​បោះឆ្នោត​របស់​​ លោក ដូណាល់ ត្រាំ កាលពី​ឆ្នាំ២០១៦ ត្រូវបានគេ​ចោទ​ប្រកាន់ថា បានប្រមូលទិន្នន័យ​​ផ្ទាល់ខ្លួន នៃអ្នក​ប្រើប្រាស់ Facebook រីឯក្រុមហ៊ុន​​បណ្ដាញទំនាក់ទំនង​​សង្គមមួយនេះ ក៏ត្រូវគេសង្ស័យ​​ផងដែរថា បណ្ដោយឱ្យ​​ក្រុមហ៊ុនអង់គ្លេស​ ​ប្រមូល និងប្រើប្រាស់​ទិន្នន័យ​ផ្ទាល់ខ្លួន​​របស់អ្នក​​ប្រើប្រាស់ Facebook​ ជាង ៥០លាននាក់ ដើម្បីជះឥទ្ធិពល​លើការបោះឆ្នោត​​ប្រធានាធិបតី អាមេរិកកាលពី​ឆ្នាំ២០១៦។ ក៏ប៉ុន្តែ ក្រុមហ៊ុន CA បានច្រានចោល​​ការចោទប្រកាន់​មកលើខ្លួន។

ដោយឡែក នៅក្នុងសេចក្ដីថ្លែង​ការណ៍ចេញផ្សាយនៅលើ Facebook កាលពីថ្ងៃពុធ លោក Zuckerberg បានទទួលស្គាល់ថា ពិតជាមានបែកធ្លាយ​ព័ត៌មានឯកជន​របស់អ្នកប្រើប្រាស់។ ប៉ុន្តែ លោកបានសន្យាថា នឹងការពារព័ត៌មានរបស់អ្នក​ប្រើប្រាស់។ «យើង មានទំនួល​ខុសត្រូវការពារ​ទិន្នន័យរបស់អ្នក ហើយបើសិន​ជាយើងមិន​អាចធ្វើវាទេ នោះយើង​មិនសាកសមនឹង​បម្រើអ្នកទេ... ហើយខ្ញុំនឹង​​ទទួលខុសត្រូវ​ចំពោះ​​អ្វីដែលកើតឡើង»។ នេះបើ​តាម​សម្តីស្ថាបនិក Facebook​ លោក Mark Zuckerberg។

គួរបញ្ជាក់ថា គិតចាប់តាំងពីព័ត៌មាន​​ខាងលើត្រូវ​បាន​បែកធ្លាយ ក្រុមហ៊ុន​អាមេរិកមួយនេះ​បាន​ខាតបង់គិត​ជាទឹក​ប្រាក់ជាង ៦០ពាន់លានដុល្លារ ដោយសារតែភាគ​ហ៊ុនធ្លាក់ចុះយ៉ាងគំហុក មិនធ្លាប់មានក្នុងរយៈពេល ០៤ឆ្នាំ៕