(វ៉ាស៊ីនតោន)៖ គណៈកម្មការសហព័ន្ធពាណិជ្ជកម្មអាមេរិក ត្រូវបានគេរាយការណ៍ថា បានបើកការស៊ើបអង្កេតមួយលើក្រុមហ៊ុន Facebook បន្ទាប់ពីមានការចោទប្រកាន់ថា ព័ត៌មានឯកជនរបស់អ្នកប្រើប្រាស់ជាង ៥០លាននាក់ ត្រូវគេយកទៅប្រើ ដើម្បី ជះឥទ្ធិពលដល់ការបោះឆ្នោតប្រធានាធិបតីអាមេរិក កាលពីឆ្នាំ២០១៦។ នេះបើតាមការចេញផ្សាយដោយ សារព័ត៌មាន BBC នៅព្រឹកថ្ងៃពុធ ទី២១ ខែមីនា ឆ្នាំ២០១៨។
ភាពចម្រូងចម្រាសបានកើតឡើងក្រោយ ក្រុមហ៊ុន Cambridge Analytica (CA) ដែលជួលដោយក្រុមយុទ្ធនាការឃោសនាឆ្នោត របស់លោក ដូណាល់ ត្រាំ កាលពីឆ្នាំ២០១៦ ត្រូវបានគេចោទប្រកាន់ថា បានប្រមូលទិន្នន័យផ្ទាល់ខ្លួននៃអ្នកប្រើប្រាស់ Facebook រីឯក្រុមហ៊ុនបណ្ដាញទំនាក់ទំនងសង្គមមួយនេះ ក៏ត្រូវគេសង្ស័យផងដែរថា បណ្ដោយឱ្យក្រុមហ៊ុនអង់គ្លេសប្រមូល និងប្រើប្រាស់ទិន្នន័យផ្ទាល់ខ្លួនរបស់អ្នកប្រើប្រាស់ Facebook ជាង ៥០លាននាក់ ដើម្បីជះឥទ្ធិពលលើការបោះឆ្នោតប្រធានាធិបតី អាមេរិកកាលពីឆ្នាំ២០១៦។ ក៏ប៉ុន្តែ ក្រុមហ៊ុន CA បានច្រានចោលការចោទប្រកាន់មកលើខ្លួន។
គួរបញ្ជាក់ថា កាលពីថ្ងៃអង្គារ ក្រុមសមាជិកសភាអង់គ្លេស បានផ្ញើលិខិតមួយដោយស្នើឱ្យស្ថាបនិក Facebook លោក Mark Zuckerberg ចូលរួមផ្ដល់សក្ខីកម្ម ស្របពេលមានព័ត៌មានថា ក្រុមហ៊ុន Facebook នឹងបញ្ជូនអ្នកតំណាងម្នាក់ទៅកាន់ទីក្រុង វ៉ាស៊ីនតោន នៅថ្ងៃពុធនេះ (ម៉ោងនៅអាមេរិក) ក្នុងគោលបំណងឆ្លើយតបនឹងសំនួររបស់សភាអាមេរិក។ បន្ថែមពីលើនេះ គិតចាប់ តាំងពីព័ត៌មានខាងលើត្រូវបានបែកធ្លាយ ក្រុមហ៊ុនអាមេរិកមួយនេះបានខាតបង់គិតជាទឹកប្រាក់ជាង ៦០ពាន់លានដុល្លារ ដោយសារតែភាគហ៊ុនធ្លាក់ចុះយ៉ាងគំហុក មិនធ្លាប់មានក្នុងរយៈពេល ០៤ឆ្នាំ៕
