(សេអ៊ូល)៖ ក្រសួង​ការពារជាតិ​កូរ៉េខាងត្បូង នៅថ្ងៃអង្គារនេះបានប្រកាសថា សហរដ្ឋអាមេរិក និងកូរ៉េខាងត្បូង​នឹងដឹកនាំការធ្វើ សមយុទ្ធយោធា​ទ្រង់ទ្រាយធំ​ប្រចាំឆ្នាំ ចាប់ពីថ្ងៃទី០១ ខែមេសា ខាងមុខនេះ ទោះបីជាវានឹងអាចធ្វើឲ្យ​កូរ៉េខាងជើង មានភាព​ក្តៅក្រហាយ​ឡើងវិញ​ក៏ដោយ។ នេះបើតាម​ការចេញផ្សាយ​ដោយ ទីភ្នាក់ងារសារ​ព័ត៌មាន យ៉ុនហាប់ នៅព្រឹកថ្ងៃអង្គារ ទី២០ ខែមីនា ឆ្នាំ២០១៨។

នៅក្នុង​សេចក្ដីថ្លែងការណ៍​របស់ខ្លួន ក្រសួង​ការពារជាតិ​កូរ៉េខាងត្បូង បានឱ្យដឹង​យ៉ាងដូច្នេះថា «ប្រមុខយោធា​នៃប្រទេស​ទំាងពីរ បានព្រមព្រៀងថា នឹងដឹកនាំការធ្វើ​សមយុទ្ធយោធា​ប្រចាំឆ្នាំ Key Resolve និង Foal Eagle នៅលើទឹកដី​កូរ៉េខាងត្បូង បន្ទាប់ពីត្រូវ​បានផ្អាកឈរ​លើស្មារតី​ នៃព្រឹត្តិការណ៍​កីឡាអូឡាំ​ពិករដូវរងា។ ការធ្វើសមយុទ្ធ​យោធានឹង​ត្រូវប្រព្រឹត្ត​ទៅ នៅថ្ងៃទី០១ ខែមេសា ហើយវានឹងត្រូវ​ដំណើរការ​ដូចឆ្នាំមុនៗ»។

គួរបញ្ជាក់ថា ក្រសួងការពារជាតិ​កូរ៉េខាងត្បូងមិនបញ្ជាក់ថា ពេលណាសមយុទ្ធនេះ​នឹងត្រូវបញ្ចប់ និងមានកងទ័ព​ចំនួនប៉ុន្មាន ចូលរួម​នោះទេ។ ក៏ប៉ុន្តែការ​ប្រកាសនេះ កើតមានឡើង​នៅចំពេលទីក្រុង​សេអ៊ូល កំពុងរៀបចំ​នីតិវិធីសម្រាប់កិច្ច​ប្រជុំអន្តរកូរ៉េ ដែលគ្រោងនឹង​ធ្វើឡើងនៅចុង​ខែមេសាខាង​មុខនេះ៕