(ម៉ូស្គូ)៖ យោងតាមលទ្ធផលបឋមប្រធានាធិបតីរុស្ស៊ី លោក វ្ល៉ាឌីមៀ ពូទីន នឹងបន្តដឹកនាំប្រទេសរុស្ស៊ីរយៈពេល ០៦ឆ្នាំទៀត ក្នុងអាណត្តិទី ៤ របស់លោក បន្ទាប់ពីទទួលបានជ័យជម្នះភ្លូកទឹកភ្លូកដី យ៉ាងងាយស្រួលបំផុត នៅក្នុងការបោះឆ្នោតប្រធានាធិបតី កាលពីថ្ងៃអាទិត្យ។ នេះបើតាមលទ្ធផលបោះឆ្នោតបណ្ដោះអាសន្ន ដកស្រង់ដោយ ទីភ្នាក់ងារសារព័ត៌មានចិន ស៊ីនហួរ នៅព្រឹកថ្ងៃចន្ទ ទី១៩ ខែមីនា ឆ្នាំ២០១៨។
យោងតាមលទ្ធផលបោះឆ្នោតបណ្ដោះអាសន្ន ចេញផ្សាយដោយគណៈកម្មាធិការជាតិ រៀបចំការបោះឆ្នោតរុស្ស៊ី លោក ពូទីន ទទួលបានសំឡេងគាំទ្ររហូតដល់ ៧៦.៦ភាគរយ។ ប៉ុន្តែក្រុមប្រឆាំង និងអង្គការសង្គមស៊ីវិលជាច្រើនបានចោទប្រកាន់ថា ការបោះឆ្នោតកាលពីថ្ងៃអាទិត្យ មិនមានតម្លាភាព និងមានការក្លែងបន្លំ ខណៈមេដឹកនាំបក្សប្រឆាំងលោក Alexei Navalny ត្រូវបានហាមឃាត់មិនឱ្យចូលរួមក្នុងការបោះឆ្នោត។
គួរបញ្ជាក់ថា ការបោះឆ្នោតប្រធានាធិបតីរុស្ស៊ី ធ្វើឡើងនៅចំពេលទីក្រុងម៉ូស្គូ និងទីក្រុងឡុងដ៍ កំពុងធ្វើសង្រ្គាមការទូតជាមួយ គ្នាតាមរយៈការបណ្ដេញមន្ត្រីទូតចេញពីប្រទេសរៀងៗខ្លួន ពាក់ព័ន្ធនឹងសំណុំរឿងអតីតចារកិច្ចរុស្ស៊ីម្នាក់ត្រូវបានគេបំពុល សម្លាប់នៅលើទឹកដីអង់គ្លេសកាលពីដើមខែមីនា។ ការបោះឆ្នោតកាលពីថ្ងៃអាទិត្យ ត្រូវបានគណៈកម្មការបោះឆ្នោតរុស្ស៊ី លើកឡើងថា មានភាពវិជ្ជមាន ដោយសារប្រជាជនបានមកចូលរួមច្រើន លើសកាលពីឆ្នាំ២០១២។
តាមដានស្ថានភាពទូទៅ នៅក្នុងការបោះឆ្នោតជ្រើសរើសប្រធានាធិបតីរុស្ស៊ី ឆ្នាំ២០១៨ ដែលមាន ២០ប្រទេស ចូលរួមអង្កេត!
(ម៉ូស្គូ)៖ ក្រៅពីប្រជាពលរដ្ឋក្នុងស្រុកសរុបជាង ១១០លាននាក់ ដែលមានសិទ្ធិបោះឆ្នោត ជនជាតិរុស្ស៊ីសរុបរាប់លាននាក់ផ្សេងទៀត ដែលកំពុងរស់នៅប្រទេសដទៃជាច្រើន នៅទូទាំងពិភពលោក ក្នុងនោះមានទាំងសហរដ្ឋអាមេរិក ចិន អឺរ៉ុប អ៊ុយក្រែន កាណាដា អង់គ្លេស ថៃ បារ៉ែន និងឧបទ្វីបគ្រីមា ផងដែរ បានចូលរួមបោះឆ្នោតនៅតាមមណ្ឌលនានា ដែលត្រូវបានរៀបចំនៅបណ្តាប្រទេសទាំងនោះ ដើម្បីជ្រើសរើសប្រធានាធិបតី ដែលពួកគេពេញចិត្ត ឧទាហរណ៍ដូចជានៅសហរដ្ឋអាមេរិក រុស្ស៊ីបានបង្កើតជាមណ្ឌលបោះឆ្នោតនៅតាមទីក្រុងធំៗ រហូតដល់ទៅ ១៥ឯណោះ ដើម្បីឲ្យប្រជាជនខ្លួននៅទីក្រុងទាំងនោះ អាចទៅបោះឆ្នោតបាន។ នេះបើតាមការដកស្រង់ការផ្សាយពី Sputnik នាយប់ថ្ងៃអាទិត្យ ទី១៨ ខែមីនា ឆ្នាំ២០១៧។
ការបោះឆ្នោតបានចាប់ផ្តើម នៅវេលាម៉ោង ៧៖០០នាទី ព្រឹក (ម៉ោងនៅម៉ូស្គូ) ហើយគ្រោងនឹងបញ្ចប់នៅល្ងាចថ្ងៃអាទិត្យដដែលនេះ។ ប្រទេសធំៗចំនួន ២០ បានបញ្ជូនអ្នកអង្កេតការរបស់ខ្លួន មកចូលអង្កេតការបោះឆ្នោតនៅរុស្ស៊ីនេះដែរ មានដូចជា សហរដ្ឋអាមេរិក វេណេស៊ុយអេឡា អង់គ្លេស ស្វីស អ៊ីតាលី អ៊ុយក្រែន និងក្រុមការងារអូទ្រីស ដែលធ្វើការនៅតំបន់គ្រីមាជាដើម។
សម្រាប់បេក្ខជនប្រមុខរដ្ឋ ដែលប្រជាពលរដ្ឋរុស្ស៊ីទាំង ១១១លាននាក់ អាចបោះឆ្នោតជូនបាននោះ គឺមានចំនួន ០៨រូប ដូចជា៖
១៖ លោក Sergei Baburin មកពីគណបក្ស All-People's Union
២៖ លោក Pavel Grudinin បេក្ខជនបក្សកុម្មុយនិស្ត
៣៖ លោក វ៉្លាឌីមៀ ពូទីន (Vladimir Putin) នៃបក្សកាន់អំណាច
៤៖ លោកស្រី Ksenia Sobchak នៃគណបក្ស Civil Initiative
៥៖ លោក Maxim Suraykin មេបក្សកុម្មុយនិស្តរុស្ស៊ី
៦៖ លោក Boris Titov ប្រធានស្នងការសម្រាប់សិទ្ធិសហគ្រិន
៧៖ លោក Grigory Yavlinsky សហស្ថាបិកបក្ស Yabloko
៨៖ លោក Vladimir Zhirinovsky ប្រធានគណបក្សសម្ព័ន្ធប្រជាធិបតេយ្យរុស្ស៊ី៕
