(អង់ការ៉ា)៖ យោងតាមចេញផ្សាយរបស់សារព័ត៌មាន Sputnik បានឲ្យដឹងថា លោក Mehmet Sinan Ince ដែលជាមេធាវីរបស់លោក Alaattin Cakici ជាមេជនអន្តពាលនៅតួកគី បានរួចខ្លួនផុតពីការចោទប្រកាន់របស់តុលាការ ពីការមានទំនាក់ទំនងជាមួយនឹងចលនាហ្គូលែន បន្ទាប់ពីការសារភាពថា លោកបានប្រើក្រដាសប្រាក់ ១ដុល្លារនោះ ដើម្បីទិញគ្រឿងញៀនប្រភេទកូកាអ៊ីន។
ក្រុមអ្នកស៊ើបអង្កេតតួកគី បានអះអាងថាអ្នកមានក្រដាសប្រាក់ ១ដុល្លារ និងលេខកូដនៅលើនោះ គឺជារបៀបសម្ងាត់មួយក្នុងការទំនាក់ទំនងក្នុងចំណោមបុគ្គល ដែលទទួលការចោទប្រកាន់ថាជា សមាជិកនៃចលនាហ្គូលែន។ ការចោទប្រកាន់នេះបានធ្វើឲ្យមនុស្សជាច្រើននាក់ ដែលចាយក្រដាសប្រាក់ ១ដុល្លារ ត្រូវបានចាប់ខ្លួននៅក្នុងប្រទេសតួក ក្នុងនោះរួមមានទាំងបុរសម្នាក់ឈ្មោះ Serkan Golge ជាជនជាតិតួកគីកាត់អាមេរិក ដែលធ្លាប់ធ្វើការជាអ្នកវិទ្យាសាស្ត្រនៅអង្គការ NASA ផងដែរ។
លោក Ince ក្រោយមកត្រូវបានឃុំខ្លួន បន្ទាប់ពីប៉ូលិសបានរុករកឃើញក្រដាសប្រាក់ ១ដុល្លារ ក្នុងអំឡុងប្រតិបត្តិការលបឆ្មក់ចូលផ្ទះរបស់លោក។ ក្នុងអំឡុងពេលជំនុំជម្រះក្តី កាលពីថ្ងៃសុក្រសប្តាហ៍មុននេះ លោក Ince បាននិយាយការពារខ្លួនឯង ដោយអះអាងថា លោកបានប្រើលុយនោះដើម្បីទិញថ្នាំញៀនកូនកាអ៊ីន ដូច្នេះហើយ រូបលោកពុំមានអ្វីដែលទាក់ទង់ជាមួយនឹងចលនា ហ្គូលែន នោះឡើយ។
តុលាការបានចេញសេចក្តីសម្រេចឲ្យដោះលែងលោក Ince វិញ ពីបទចោទប្រកាន់ពាក់ព័ន្ធនឹងរដ្ឋប្រហារ។ បើតាមការកាត់ក្តីបែបនេះ យើងអាចនិយាយបានថាតុលាការតួកគីអាចចោទ ថានរណាម្នាក់ជាសមាជិកនៃចលនាហ្គូលែនគ្រាន់ត្រឹមតែអ្នក នោះមានក្រដាសប្រាក់១ដុល្លារនៅក្នុងហោប៉ៅ ឬនៅផ្ទះប៉ុណ្ណោះ។ ហើយយើងអាចនិយាយបានទៀតថា សមាជិកនៃចលនាហ្គូលែន គឺជាមនុស្សមិនប្រព្រឹត្តរឿងដូចជាការលេងល្បែង ឬប្រើប្រាស់គ្រឿងញៀនឡើយ។
ប្រភពព័ត៌មាន៖ SCF
