(ម៉ានីល)៖ យ៉ាងហោចណាស់មនុស្ស ០៤នាក់ បានបាត់បង់ជីវិត និង ១៤នាក់ ផ្សេងទៀតរងរបួស នៅក្នុងអគ្គីភ័យដ៏សន្ធោសន្ធៅមួយ ដែលបានលេបត្របាក់សណ្ឋាគារ និងកាស៊ីណូ មួយកន្លែងនៅក្នុងរដ្ឋធានីម៉ានីល កាលពីព្រឹកថ្ងៃអាទិត្យនេះ។ នេះបើតាមការចេញផ្សាយដោយ ទីភ្នាក់ងារព័ត៌មានចិន ស៊ីនហួរ នារសៀលថ្ងៃអាទិត្យ ទី១៨ ខែមីនា ឆ្នាំ២០១៨។
យោងតាមមន្ត្រីនៃការិយាល័យសង្គ្រោះពេលគ្រាមានអាសន្ន ប្រចាំទីក្រុងម៉ានីល គឺលោក Johnny Yu បានអះអាងថា ក្នុងចំណោមមនុស្សរងរបួសទាំង ១៤នាក់ គឺមានមួយចំនួនស្ថិតនៅក្នុងស្ថានភាពធ្ងន់ធ្ងរ ហើយសម្រាប់អ្នកស្លាប់ទាំង ០៤នាក់ គឺដោយសារតែការឈ្លក់ផ្សែងភ្លើង និងរងរបួសធ្ងន់ធ្ងរពេក ខណៈដែលអគ្គីភ័យបានឆេះសន្ធោសន្ធៅខ្លាំង ចាប់តាំងពីជាន់ទី ៣ នៃអគារសណ្ឋាគារ-កាស៊ីណូ។
គួរបញ្ជាក់ថា ក្រុមពន្លត់អគ្គីភ័យនៅទីក្រុងម៉ានីល បានព្យាយាមយ៉ាងខ្លាំង នៅក្នុងការពន្លត់ភ្លើងឆេះសណ្ឋាគារ Manila Pavilion Hotel and Casino នេះ ហើយសម្រាប់មូលហេតុ ដែលបានបង្កគ្រោះថ្នាក់នេះឡើង កំពុងស្ថិតនៅក្នុងការស៊ើបអង្កេតនៅឡើយ៕
