(វ៉ាស៊ីនតោន)៖ ប្រធានាធិបតី​អាមេរិក លោក ដូណាល់ ត្រាំ ត្រូវបានគេរាយការណ៍ថា បានសម្រេចចិត្តថា នឹងបណ្ដេញ​ទីប្រឹក្សាសន្តិសុខជាតិ​របស់លោក គឺលោក ម៉ាក់ម៉ាស្ទឺរ (H.R. McMaster)​ ចេញពីតំណែង។ ប៉ុន្តែការ​សម្រេចចិត្តនេះ នឹងមិនត្រូវប្រកាស​ភ្លាមៗ​នោះឡើយ។ នេះបើតាម​ការចេញផ្សាយ​ដោយ ទីភ្នាក់ងារ​សារព័ត៌មាន Reuters នៅព្រឹកថ្ងៃសុក្រ ទី១៦ ខែមីនា ឆ្នាំ២០១៨។

Reuters ផ្អែកលើសេចក្ដី​រាយការណ៍របស់ Washington Post​ ដែលទទួលបាន​ការបញ្ជាក់ពីមន្ត្រី​អាមេរិកចំនួន ០៥រូប បានឱ្យដឹង​ថា លោក ត្រាំ សម្រេច​ចិត្តថា នឹងដកលោក McMaster ចេញពី​តំណែង ហើយលោក​ក៏កំពុងពិចារណា​ផងដែរ លើបេក្ខភាពដែល អាចជំនួស​ទីប្រឹក្សាសន្តិសុខជាតិ​រូបនេះ ក្នុងនោះរួមមាន​ទាំងអតីតអគ្គរដ្ឋទូត​អាមេរិក ប្រចំាអង្គការសហប្រជាជាតិ លោក ចន បូលតុន (John Bolton) និងប្រធានការិយាល័យ​ក្រុមប្រឹក្សា​សន្តិសុខ UN លោក ខេត ខែលឡុក (Keith Kellogg)។ ប៉ុន្តែខាងសេតវិមាន​មិនទាន់ធ្វើការ អត្ថាធិប្បាយ​អ្វីនៅឡើយ​នោះទេ។

គួរបញ្ជាក់ថា សេចក្ដីរាយការណ៍​ខាងលើ កើតឡើងតែប៉ុន្មាន​ថ្ងៃ​ប៉ុណ្ណោះ បន្ទាប់ពីលោក ដូណាល់​ ត្រាំ បានសម្រេច​ចិត្ត​បណ្ដេញ លោក រិច ធីល្លឺសុន ចេញពី​តំណែង​រដ្ឋមន្ត្រីការបរទេស​អាមេរិក ហើយដាក់​នាយក CIA លោក Mike Pompeo​ ឱ្យជំនួស​តំណែង​នេះវិញ៕ ​