(វ៉ាស៊ីនតោន)៖ ក្រុមមន្ត្រី​អាមេរិក​បានឱ្យដឹង​ថា មនុស្សយ៉ាង​ហោច​ណាស់ ០៤នាក់​បានស្លាប់ និង១០នាក់​ទៀតរងរបួស នៅក្នុង​ហេតុការណ៍​រលំបាក់ស្ពាន​មួយកន្លែង (សម្រាប់អ្នកដំណើរដើរឆ្លងពីលើផ្លូវថ្នល់) នៅក្បែរសាកល​វិទ្យាល័យ Florida International University ក្នុង​ទីក្រុង ម៉ៃអាមី (Miami) នៃរដ្ឋផ្លូរីដា (Florida)។ នេះបើតាម​ការចេញ​ផ្សាយដោយ ទីភ្នាក់ងារសារ​ព័ត៌មានចិន ស៊ីនហួរ នៅព្រឹកថ្ងៃសុក្រ ទី១៦ ខែមីនា ឆ្នាំ២០១៨។

យោងតាមក្រុម​មន្ត្រីអាមេរិក ក្រុមអ្នកជួយសង្រ្គោះ​មកទល់នឹងយប់​ថ្ងៃព្រហស្បតិ៍ នៅតែបន្តស្វែងរក​ជនរងគ្រោះ ដែលគេជឿជាក់​បានជាប់នៅក្រោម​គំនរស្ពានបាក់បែក ខណៈគេមិនទាន់​ដឹងចំនួនពិតប្រាកដ នៃមនុស្សនៅក្រោមស្ពាន​នេះនៅ​ឡើយទេ។ ស្ពាននេះ​បានដួលរលំ កាលពីរសៀល​ថ្ងៃព្រហស្បតិ៍ (ម៉ោងនៅអាមេរិក) ដោយសង្កត់​យានយន្ដ យ៉ាងហោច​ណាស់ ០៨គ្រឿង ចំណែកឯ ប្រធានក្រុម​ពន្លត់អគ្គិភ័យ​ប្រចំាតំបន់ លោក ដេវ ដូវណេយ (Dave Downey) ក៏បានអះអាង​ដែរថា មនុស្ស ០៤នាក់​បានស្លាប់ និង​១០នាក់ទៀត​រងរបួស។

គួរបញ្ជាក់ថា បើតាមគេហទំព័រ​សាកលវិទ្យាល័យ Florida International University ស្ពានខាងលើដែល​បានបាក់រលំ មាន​ទម្ងន់ ៨៦២តោន និងប្រវែង ៥៣ម៉ែត្រ ព្រមទាំងគំរោង​សម្ពោធនៅដើម​ឆ្នាំក្រោយ។ មូលហេតុនៃហេតុការណ៍​រលំបាក់ស្ពាននេះ មិនទាន់ត្រូវ​បានបញ្ជាក់ទេ៕