(អាមេរិក)៖ រដ្ឋអាឡាស្កា (Alaska) នៅភាគពាយ័ព្យសហរដ្ឋអាមេរិក កំពុងជិតសម្រេចបាន ការវិនិយោគទុនដ៏ច្រើនសន្ធឹកសន្ធាប់ ពីប្រទេសចិនហើយ នៅក្នុងមហិច្ឆតាកម្មវិធីថាមពលរបស់ខ្លួន បន្ទាប់ពីគម្រោងដ៏ធំមួយ ពាក់ព័ន្ធនឹងការផ្គត់ផ្គង់ធនធានឧស្ម័នធម្មជាតិកែច្នៃ LNG នៅក្នុងរដ្ឋនេះ ទើបតែទទួលបានភ្លើងខៀវពីរដ្ឋាភិបាល។ នេះបើតាមការចេញផ្សាយដោយ ទីភ្នាក់ងារព័ត៌មានចិន ស៊ីនហួរ នៅព្រឹកថ្ងៃព្រហស្បតិ៍ ទី១៥ ខែមីនា ឆ្នាំ២០១៨។
គណៈកម្មការនិយតកម្មថាមពលសហព័ន្ធអាមេរិក បានកំណត់យកខែធ្នូ ឆ្នាំ២០១៩ ជាពេលដែលគម្រោងឧស្ម័ន LNG អាឡាស្កា ទទួលបានលទ្ធផលនៃការត្រួតពិនិត្យទៅលើផលប៉ះពាល់នៃគម្រោងនេះ ទៅលើបរិស្ថាន ដែលស្ថានការណ៍វិវត្តន៍នេះ ត្រូវបានអភិបាលរដ្ឋអាឡាស្កា លោក បៀល វ៉កខឺ (Bill Walker) លើកឡើងថាជាការរួចផុតឧបសគ្គដ៏ធំមួយ សម្រាប់ការបណ្តាក់ទុកវិនិយោគ នៅក្នុងគម្រោងនេះ។ បើសិនជាអ្វីៗប្រព្រឹត្តទៅយ៉ាងប្រសើរ គម្រោងនេះត្រូវគេរំពឹងថា នឹងទទួលបានការអនុញ្ញាតឲ្យចាប់ផ្តើមការសាងសង់នៅខែមីនា ឆ្នាំ២០២០ ហើយអាចធ្វើប្រតិបត្តិការបាននៅឆ្នាំ២០២៥។
គម្រោង LNG នៅក្នុងរដ្ឋអាឡាស្កានេះ នឹងតភ្ជាប់ឃ្លាំងស្តុកឧស្ម័នធម្មជាតិមួយកន្លែង នៅឯតំបន់ Prudhoe Bay ភាគខាងជើងអាឡាស្កា តាមរយៈបំពង់ឧស្ម័នប្រវែងប្រហែល ១,២៨០គីឡូម៉ែត្រ ជាមួយរោងចក្រកែច្នៃឧស្ម័ន ទៅជាសារធាតុរាវមួយកន្លែងទៀត នៅភាគខាងត្បូង។ ប្រសិនបើវាអាចបញ្ចប់រួចរាល់ គម្រោងនេះនឹងមានសមត្ថភាពផ្គត់ផ្គង់ឧស្ម័នធម្មជាតិប្រមាណ ៣.៩ពាន់លានម៉ែត្រគូបក្នុងមួយថ្ងៃ។
គួរជម្រាបថា អាឡាស្កា កំពុងមានភាពសកម្មជាខ្លាំង ក្នុងការស្វែងរកមូលនិធិពីបរទេស ជាពិសេសនោះគឺការវិនិយោគពីប្រទេសចិន តែម្តងសម្រាប់កម្មវិធីផ្គត់ផ្គង់ថាមពលរបស់ខ្លួន។ កាលពីខែវិច្ឆិកាឆ្នាំទៅ អាជ្ញាធរអាឡាស្កា បានចុះហត្ថលេខាលើកិច្ចព្រមព្រៀងមួយ ជាមួយក្រុមហ៊ុនថាមពលចិន Sinopec ជុំវិញការទិញយកធនធាន LNG ពីរដ្ឋអាឡាស្កា។
ម៉្យាងវិញទៀត កាលពីសប្តាហ៍មុន លោក Walker បានប្រកាសថា រូបលោកនឹងដឹកនាំប្រតិភូមួយក្រុម ដែលរួមមាននូវអ្នកតំណាងផ្នែកពាណិជ្ជកម្មប្រចាំរដ្ឋ ទៅកាន់ប្រទេសចិន នាខែឧសភាខាងមុខ ដើម្បីរឹងចំណងពាណិជ្ជកម្មរបស់រដ្ឋអាឡាស្កា ជាមួយនិងមហាអំណាចសេដ្ឋកិច្ចលេខពីរ នៅលើពិភពលោកមួយនេះ៕
