(កាណាដា)៖ អាជ្ញាធរកាណាដាបានបង្កើតកំហុសឆ្គងមួយ ដោយដាក់ច្រឡំទង់ជាតិអាល្លឺម៉ង់ ជំនួសទង់ជាតិប្រទេសប៊ែលហ្សិក ជាកិច្ចស្វាមគន៍ដំណើរទស្សនកិច្ច របស់ក្រុមគ្រួសាររាជវង្សប៊ែលហ្សិក មកកាន់ទីក្រុងអូតតាវ៉ា កាលពីថ្ងៃចន្ទ មុននឹងវាត្រូវបានដូរចេញវិញភ្លាមៗ។ នេះបើតាមការចេញផ្សាយដោយ ទីភ្នាក់ងារសារព័ត៌មានចិន ស៊ីនហួរ នៅរសៀលថ្ងៃពុធ ទី១៤ ខែមីនា ឆ្នាំ២០១៨។
ការភ័ន្តច្រឡំកើតមានឡើងនៅចំពេល នៃការបំពេញដំណើរទស្សនកិច្ចជាលើកដំបូងបំផុត មកកាន់ប្រទេសកាណាដា ក្នុងរយៈពេលជាង ៤០ឆ្នាំមកនេះ។ ព្រះអង្គម្ចាស់ ហ្វីលីព (Philippe) និងម្ចាស់ក្សត្រី ម៉ាត់ធីល (Mathilde) ត្រូវបានទទួលស្វាគមន៍នៅឯវិមានរបស់អគ្គទេសាភិបាល ជូលៀ ផាយេត (Julie Payette) ដែលជាតំណាងរបស់ម្ចាស់ក្សត្រី អេលីហ្សាប៊ែតទី ២ (Elizabeth II)។
ជាមួយគ្នានោះ ព្រះអង្គម្ចាស់ Philippe និងម្ចាស់ក្សត្រី Mathilde ក៏បានចូលរួមផងដែរ ក្នុងពិធីដាំដើមឈើ នៅក្បែរដើមឈើមួយ ត្រូវបានដាំដោយម្ចាស់ក្សត្រី ប៊ែលហ្សិក ហ្វាប្យូឡា (Fabiola) កាលពីឆ្នាំ១៩៧៧។ ប៉ុន្តែស្រាប់តែ ទ្រង់ទាំងពីរបែរជាបានឃើញទង់ជាតិអាល្លឺម៉ង់ ដោតនៅលើដើមឈើនេះទៅវិញ។
គួរបញ្ជាក់ថា កំហុសឆ្គងនេះត្រូវបានផ្សព្វផ្សាយនៅលើ Twitter ដោយអ្នកសារព័ត៌មានប៊ែលហ្សិកម្នាក់ឈ្មោះ វីម ដេហេនស្គូតធើ (Wim Dehandschutter)។ ទង់ជាតិអាល្លឺម៉ង់ និងទង់ជាតិប៊ែលហ្សិក មានពណ៌ខ្មៅ ក្រហម និងលឿង ដូចគ្នាខុសត្រង់តែទង់ជាតិ អាល្លឺម៉ង់គឺផ្កេក រីឯទង់ជាតិប៊ែលហ្សិកគឺបញ្ឈរ៕
