(សេអ៊ូល)៖ អតីតប្រធានាធិបតី​កូរ៉េខាងត្បូង លោក លី ម្យុងបាក់ (Lee Myung-bak) បានបង្ហាញមុខចំពោះព្រះរាជអាជ្ញា នៃតុលាការទីក្រុងសេអ៊ូលហើយ នៅព្រឹកថ្ងៃពុធនេះ ដើម្បីធ្វើការស្រាយបំភ្លឺ ជុំវិញបទចោទប្រកាន់នានា​មកលើរូបលោក ពាក់ព័ន្ធនឹង​អំពើ​ពុករលួយ។ នេះបើតាមការ​ចេញផ្សាយដោយ ទីភ្នាក់ងារព័ត៌មានចិន ស៊ីនហួរ នៅព្រឹកថ្ងៃពុធ ទី១៤ ខែមីនា ឆ្នាំ២០១៨។

លោក លី ដែលបានចប់​អាណត្តិកាន់អំណាចរយៈពេល ០៥ឆ្នាំ កាលពីឆ្នាំ២០១៣​​ នោះ​​បាន​បង្ហាញខ្លួន នៅចំពោះមុខតុលាការ​នៃសង្កាត់ ភាគកណ្តាល​​ទីក្រុង​សេអ៊ូល ក្នុងនាមជន​សង្ស័យ​នៃការប្រព្រឹត្ត​បទឧក្រិដ្ឋ ក្រោយពីមាន​​ការចោទប្រកាន់ថា លោកបានទទួល​​ប្រាក់​សំណូក ១០លានដុល្លារ ពីក្រុមហ៊ុន និងទីភ្នាក់ងារ​ស៊ើបអង្កេត​នានា​​នៅក្នុងប្រទេស​​កូរ៉េខាងត្បូង។

គួរបញ្ជាក់ថា លោក លី បានក្លាយជាអតីតប្រធានាធិបតី​កូរ៉េខាងត្បូង​ចុងក្រោយហើយ ដែលត្រូវបាន​ក្រុមរដ្ឋអាជ្ញាធ្វើការស៊ើបអង្កេត ជុំវិញករណីពុករលួយ ខណៈដែល​សាល​ក្រមទៅលើអតីតប្រធានាធិបតី​មួយរូបទៀត គឺលោកស្រី ផាក គឺនហេ ដែលត្រូវបាន​បណ្តេញចេញពី​អំណាចកាលពីឆ្នាំ២០១៧ ជុំវិញករណីពុករលួយដែរនោះ នឹងត្រូវប្រកាស​នៅអំឡុងខែមេសា ខាងមុខនេះហើយ៕