(កាប៊ុល)៖ រដ្ឋមន្ត្រីការពារជាតិ​អាមេរិក លោក ចេមស៍ ម៉ាត់ទីស (James Mattis) នៅថ្ងៃអង្គារនេះ បានបំពេញ​ដំណើរទស្សនកិច្ច​ស្ងាត់ៗដោយ​មិនបាន​ប្រាប់​ជាមុន​ មកកាន់​រដ្ឋធានីកាប៊ុល ប្រទេស​អាហ្វហ្គានីស្ថាន។ នេះបើតាមការផ្សាយដោយទូរទស្សន៍​ក្នុងស្រុក អាហ្វហ្គានីស្ថាន ដកស្រង់​ដោយទីភ្នាក់ ងារសារព័ត៌មានចិន ស៊ីនហួរ នៅរសៀលថ្ងៃអង្គារ ទី១៣ ខែមីនា ឆ្នាំ២០១៨។

យោងតាមទូរទស្សន៍​អាហ្វហ្គានីស្ថាន 1TV ប្រមុខមន្ទីរបញ្ចកោណ​រូបនេះ នឹងត្រូវជួបពិភាក្សា​ការងារជាមួយប្រធានាធិបតី អាហ្វហ្គានីស្ថាន លោក ម៉ាហាំម៉េដ អាស្រាហ្វ ហ្គានី (Mohammad Ashraf Ghani) ដើម្បី​ពិភាក្សាគ្នា ជុំវិញបញ្ហាពាក់ព័ន្ធ​នឹងទំនាក់ទំនង​ និងផល​ប្រយោជន៍​រួមគ្នា រវាងប្រទេស​ទាំងពីរ ជាពិសេស​គឺផ្ដោតសំខាន់​ លើសង្រ្គាមប្រឆាំង​នឹងពួកភេរវករ និងការស្វែងរក​សន្តិភាព​ នៅក្នុងប្រទេស​អាហ្វហ្គានីស្ថាន។

មិនតែប៉ុណ្ណោះបន្ទាប់​ពីជំនួបនេះ លោក James Mattis នឹងទៅសួរសុខទុក្ខកង​ទ័ពអាមេរិក និងសម្ព័ន្ធមិត្ត ដែលកំពុង​ស្ថិតនៅ ក្នុងប្រទេស​អាហ្វហ្គានីស្ថាន។ ប៉ុន្តែគួរឱ្យកត់​សម្គាល់ ដំណើរទស្សនកិច្ច​នេះ ធ្វើឡើងតែជាងមួយ​សប្ដាហ៍​ប៉ុណ្ណោះ បន្ទាប់ពី ក្រុមឧទ្ទាមតាលីបង់​បង្ហាញពីបំណងចង់​ជួបចរចា ស្វែងរកសន្តិភាព​ជាមួយទីក្រុង​កាប៊ុល៕