(តូក្យូ)៖ នាយករដ្ឋមន្ត្រី​ជប៉ុន លោក ស៊ីនហ្សូ អាបេ នៅថ្ងៃអង្គារនេះ​បាន​និយាយថា ជប៉ុនចង់ឃើញ​ដំណោះស្រាយមួយ សម្រាប់បញ្ហាចាប់​ជម្រិតពលរដ្ឋជប៉ុន លេចឡើង​ជារូបរាង ចេញ​ពីកិច្ចចរចាជាមួយកូរ៉េខាងជើង ហើយថា​ទីក្រុងព្យុងយ៉ាង គួរតែធ្វើសកម្មភាព​ជាជាង​និយាយ។ នេះបើតាម​​ការចេញផ្សាយដោយ ទីភ្នាក់ងារ​សារព័ត៌មាន Reuters នៅព្រឹក​ថ្ងៃអង្គារ ទី១៣ ខែមីនា ឆ្នាំ២០១៨។

លោក អាបេ ថ្លែងបែបនេះ បន្ទាប់ពីនាយកទីភ្នាក់ងារ​ស៊ើបការណ៍សំងាត់​កូរ៉េខាងត្បូង លោក ស៊ូហ៍ ហ៊ូន (Suh Hoon) បានបញ្ជាក់​ក្នុងអំឡុងពេល ជួបជាមួយ​រដ្ឋមន្ត្រី​ការបរទេស​ជប៉ុន កាលពីថ្ងៃចន្ទក្នុង​ទីក្រុងតូក្យូថា លោកមិន​បានពិភាក្សា​ពីបញ្ហា​ចាប់​ជម្រិតពលរដ្ឋជប៉ុន ដោយកូរ៉េខាងជើង​ឡើយ នៅពេលលោក​បំពេញទស្សនកិច្ច​ ទៅកាន់​ទីក្រុង​ព្យុងយ៉ាង និង​ទីក្រុងវ៉ាស៊ីនតោន​នាពេលថ្មីនេះ។

មិនតែប៉ុណ្ណោះ លោកថែមទាំង​បានអះអាង​ទៀតថា ជំនួបជា​មួយ​លោក គីម ជុងអ៊ុន គឺផ្ដោតសំខាន់​តែលើការលុបបំបាត់​អាវុធ នុយក្លេអ៊ែរ​នៅលើឧបទ្វីបកូរ៉េ​ និងការរៀបចំ​កិច្ចប្រជុំអន្តរកូរ៉េ​តែប៉ុណ្ណោះ។

គួរបញ្ជាក់ថា ប្រធានាធិបតី​អាមេរិកលោក ដូណាល់ ត្រាំ បានយល់ព្រម​ជួបលោក គីម ជុងអ៊ុន នៅខែឧសភា​ខាងមុខនេះ ខណៈប្រធានាធិបតី​កូរ៉េខាងត្បូង លោក មូន ជែអ៊ីន គ្រោងនឹងជួប​ជាមួយមេដឹកនាំ​កូរ៉េខាងជើង​រូបនេះ នៅ​ខែមេសា៕