(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ បាន​ចេញបញ្ជាលើកលែង​ទោសដលើ​​មន្ត្រី​កងទ័ព​ជើងទឹកអាមេរិកមួយរូប ដែលត្រូវបាន​សម្រេចឲ្យជាប់ពន្ធនាគារ ដោយសារ​តែរូបគេ​​បានថតរូប​ នៅក្នុងបន្ទប់​បញ្ជាការ​ពិសេស នៃនាវាមុជទឹក​នុយក្លេអ៊ែរ ដែលជារឿង​​សម្ងាត់បំផុតមួយ ពាក់ព័ន្ធនឹង​សន្តិសុខជាតិ​នោះ។​ នេះបើតាម​​ការចេញផ្សាយ ដោយទីភ្នាក់​ងារ​ព័ត៌មានចិន ស៊ីនហួរ នាព្រឹក​​ថ្ងៃសៅរ៍ ទី១០ ខែមីនា ឆ្នាំ២០១៨។

មន្ត្រីកងទ័ពជើងទឹក​ខាងលើនេះ មានឈ្មោះ គ្រីស្ទាន សូស៊ឺ (Kristian Saucier) ត្រូវបាន​ទទួលរងការចោទប្រកាន់ កាលពី​ខែឧសភា ឆ្នាំ២០១៦ លើបទល្មើស​ចំនួនពីរករណី នោះគឺការប្រើប្រាស់​ទូរស័ព្ទដៃ ថតរូបនៅក្នុងបន្ទប់​បញ្ជាការ នៃនាវាមុជទឹកដ៏សម្ងាត់​របស់កងទ័ពជើងទឹក និងមួយទៀត គឺលោកបានធ្វើ​ឲ្យខូចឧបករណ៍​ដែលខ្លួនកាន់កាប់ នៅអំឡុងពេល​ដែលលោក​កំពុងស្ថិត នៅក្នុងការស៊ើប​អង្កេតនៅ​ឡើយនោះ ហើយក្រោយ​មកត្រូវបាន​តុលាការ សម្រេចឲ្យជាប់​គុករយៈពេល ១២ខែ។

សេតវិមានអាមេរិក បានឲ្យដឹងនៅថ្ងៃសុក្រសប្តាហ៍នេះថា «លោកប្រធានាធិបតីបាន សម្រេចលើកលែងទោស លោក គ្រីស្ទាន សូស៊ឺ ពីការជាប់ពន្ធនាគារយោធា ក្នុងរយៈពេល ១២ខែនោះហើយ»។ នេះជា​លើកទីពីរហើយ ក្នុងតំណែងជាប្រធានាធិបតីអាមេរិក ដែលលោក ដូណាល់ ត្រាំ បានប្រើសិទ្ធិ​លើកលែងទោស ចំពោះមន្ត្រីយោធា​ដែលបាន​ប្រព្រឹត្ត​បទ​ល្មើស ហើយមន្ត្រីយោធា​ទី ១ ដែលត្រូវបាន​លើកលែង​ទោស​ដែរនោះ គឺលោក Joe Arpaio ដែលបានរងការចោទប្រកាន់ កាលពី​ខែសីហា ឆ្នាំ២០១៧៕