(ប៉េកាំង)៖ ប្រព័ន្ធ​តុលាការ​ចិនបានបិទបញ្ចប់​ សំណុំរឿងពុករលួយ​ មានជាប់ពាក់ព័ន្ធ​នឹងអតីតមន្ត្រីជាន់ខ្ពស់ចិន​ថា្នក់ខេត្ត និង​ថ្នាក់ក្រសួង ១០១នាក់ ចាប់ពីឆ្នាំ២០១៣ ដល់ឆ្នាំ២០១៧។ នេះបើតាម​តុលាការកំពូល​ប្រជាជនចិន ដកស្រង់​ដោយទីភ្នាក់​ងារសារព័ត៌មាន​ចិន ស៊ីនហួរ នៅរសៀលថ្ងៃសុក្រ ទី០៩ ខែមីនា ឆ្នាំ២០១៨។

លោក ស៊ី ជិនពីង បានកាន់ដំណែង​ជាប្រធានាធិបតីចិន កាលពីចុងឆ្នាំ២០១២ ហើយក្នុងឆ្នាំ​ដដែលនោះ​ដែរ លោកត្រូវបានគេ​មើលឃើញថា បានចាប់ផ្ដើមពង្រឹង​អំណាចកាន់តែ​ខ្លាំង តាមរយៈការដាក់​ចេញនូវយុទ្ធនាការ​ បោសសំអាត​អំពើពុក​រលួយ ទាំងទៅលើមន្ត្រី នៅក្នុងជួរបក្ស​កុម្មុយនិស្ដចិន និងរដ្ឋាភិបាល​របស់លោក។​

ការដាក់ចេញ​នូវយុទ្ធនាការនេះ​ទៀតសោត ក៏ត្រូវបាន​គេចាត់ទុក​ផងដែរថា ជាការបង្រ្កា​អំពើ​ពុក​រលួយ​ធំបំផុត គិតចាប់តាំង​ពីសម័យលោក ម៉ៅ សេទុង មក។ ពោលបើតាម​របាយករណ៍របស់​អាជ្ញាធរចិន គិតត្រឹមដំណាច់ឆ្នាំ២០១៧ មន្ត្រីចិនជាង ១.៣៤លាននាក់ ក្នុងនោះមាន​ទាំងមន្ត្រីជាន់ខ្ពស់ និងមន្ត្រីធម្មតា ឬគេហៅថា «មន្ត្រីខ្លា និងមន្ត្រី​រុយ» បានស្ថិតនៅក្រោម​គោលដៅ នៃការស៊ើបអង្កេត ឬក៏ត្រូវបានគេចោទ​ប្រកាន់ពីបទ​ពុករលួយ។

បន្ថែមពីលើនេះ កុំថាឡើយមន្ត្រី​ជាន់ខ្ពស់ សូម្បីតែមន្ត្រីកំពូល​ៗក្នុងជួរគណបក្ស​កុម្មុយនិស្ដចិន ក៏មិនអាចរួចខ្លួន​ពីយុទ្ធនាការ ប្រឆាំងនឹងអំពើពុក​រលួយនេះ​បានដែរ។ ជាក់ស្ដែង​មន្ត្រីកំពូលៗចិន មានដូចជាលោក ចូវ យុងកាង (Zhuo Yongkang), លោក ស៊ុន ចេងកៃ (Sun Zhengcai) និង លោក ហ្កូ បូសៀង (Guo Boxiang) ជាដើមត្រូវ​បានគេតុលាការ​ចិនចោទប្រកាន់​ និងកាត់ទោស​ឱ្យជាប់​ពន្ធនាគារ។

គួរបញ្ជាក់ថា ដោយសារតែយុទ្ធនាការ​ប្រឆាំងនឹងអំពើពុក​រលួយនេះឯង បានធ្វើឱ្យអំណាច​របស់លោក ស៊ី ជិនពីង រីកធំកាន់​តែខ្លាំង​រហូតដល់​សមាជបក្ស​ ស្នើឱ្យលុបចោល​ការកំណត់អាណត្តិ​ប្រធានាធិបតី ព្រមទាំងបញ្ចូល​ទ្រឹស្ដីរបស់លោក ទៅក្នុង​រដ្ឋធម្មនុញ្ញ​ចិន។ លោក ស៊ី នឹងត្រូវផុត​អាណត្តិ​ជាប្រធានាធិបតី​ចិន នៅឆ្នាំ២០២៣ ប៉ុន្តែបើសិន​ជារដ្ឋធម្មនុញ​ចិនត្រូវបាន​ធ្វើ​វិសោធនកម្ម នោះលោកអាចនឹងក្លាយជា​ប្រធានាធិបតីចិន​ដំបូងគេបំផុត ដែលកាន់អំណាច​យូរជាងគេ ឬអាច​លើសឆ្នាំ​២០២៣ ទៅទៀត៕ ​