(វ៉ាស៊ីនតោន)៖ ក្រុមហ៊ុន Google ត្រូវបាន​គេរាយការណ៍ថា កំពុងធ្វើការងារ​ជាមួយក្រសួងការពារជាតិ​អាមេរិក ជុំវិញការផ្គត់ ផ្គង់បច្ចេកវិទ្យា​ស៊ើបការណ៍​សំងាត់ (​AI) ដែលអាចនឹង​ត្រូវយកទៅ​ប្រើប្រាស់ ដើម្បីជួយសម្រួល​ដល់ការវាយប្រហារ​តាម ផ្លូវអាកាស​លើក្រុមសកម្មយុទ្ធ​ នៅក្នុងប្រទេស​ស៊ីរី និងអ៊ីរ៉ាក់។ នេះបើតាម​គេហទំព័រ Intercept​ ដកស្រង់ដោយ​ទីភ្នាក់ងារ​សារព័ត៌មាន​ចិន ស៊ីនហួរ នៅរសៀលថ្ងៃពុធ ទី០៧ ខែមីនា ឆ្នាំ២០១៨។

យោងតាម Intercept ក្រុមហ៊ុន Google កំពុងធ្វើការងារ​ជាមួយក្រសួង​ការពារជាតិ​អាមេរិក ក្នុងការអភិវឌ្ឍ​បច្ចេកវិទ្យា​​ស៊ើបការណ៍ AI សម្រាប់បំពាក់​​លើយន្ដហោះដ្រូន ដែលវាអាចវិភាគ និងផ្ដិតយក​រូបភាព ហើយបញ្ជូនឱ្យ​យោធាអាមេរិក​ ដើម្បីវិភាគបន្ត មុននឹងដឹកនាំការ​វាយប្រហារតាម​ផ្លូវអាកាស​ ប្រឆាំងនឹងក្រុម ISIS។

Intercept​ បានឱ្យដឹង​ទៀតថា គំរោងខាង​លើរវាង Google​ និងក្រសួង​ការពារជាតិ​អាមេរិក មានឈ្មោះថា Project Maven ដែលត្រូវបាន​ប្រកាសជា​លើកដំបូង កាលពីមេសា ឆ្នាំ២០១៧ ដោយអនុរដ្ឋមន្ត្រី​ការពារជាតិ​អាមេរិក លោក រ៉ូប៊ឺត វើក (Robert Work)។ បើតាម​គំរោងនេះ សហរដ្ឋអាមេរិក​មានផែនការ​បំពាក់​បច្ចេកវិទ្យា AI​ នេះលើយន្ដហោះ​ដ្រូនជាង ​១,១០០គ្រឿង ខណៈក្រសួង​ការពារជាតិអាមេរិក បាន​ចំណាយប្រាក់​ជាង ៧.៤ពាន់លានដុល្លារ​ទាក់ទិន នឹងបច្ចេកវិទ្យានេះ កាលពី​ឆ្នាំ២០១៧។

ប៉ុន្តែយ៉ាងណាក៏ដោយ គំរោងសាកល្បនេះ​មិនទាន់ត្រូវបានបង្ហាញ​ជាសាធារណៈឡើយ ប៉ុន្តែ​ក្រុមហ៊ុន Google បានបញ្ជាក់ ពីកិច្ចខិតខំប្រឹងប្រែង​របស់បុគ្គលិក​របស់ខ្លួន តាមរយៈព័ត៌មាន​ផ្ទៃក្នុងតែ​ប៉ុណ្ណោះ។ លើសពីទៅទៀត ក្រុមហ៊ុនយក្ស​ខាងបច្ចេក វិទ្យាអាមេរិក​មួយនេះ ក៏បានអះអាង​ផងដែរទៅកាន់បុគ្គលិក​ខ្លួនថា គំរោង Project Maven មានមានជាប់ពាក់ព័ន្ធ​នឹងការប្រើ​ប្រាស់ប្រព័ន្ធ AI​ ក្នុងសង្រ្គាម​នោះទេ៕ ​