(អ៊ីស្រាអែល)៖ នាវាដឹកយន្តហោះ USS Iwo Jima របស់សហរដ្ឋអាមេរិក នឹងមកដល់ក្បែរឆ្នេរ នៃប្រទេសអ៊ីស្រាអែលនាពេលឆាប់ៗនេះ ដើម្បីចូលរួមសមយុទ្ធយោធារួមរវាងអ៊ីស្រាអែល និងអាមេរិក។ នេះបើតាមការបញ្ជាក់ឲ្យដឹង ពីកងកម្លាំងការពារជាតិអ៊ីស្រាអែល (IDF) ដកស្រង់ដោយទីភ្នាក់ងារព័ត៌មានចិន ស៊ីនហួរ នៅព្រឹកថ្ងៃពុធ ទី០៧ ខែមីនា ឆ្នាំ២០១៨។
នាវាដឹកយន្តហោះ អ៊ីវ៉ូ ជីម៉ា (Iwo Jima) មានផ្ទុកកងម៉ារីនអាមេរិកចំនួន ១,៤០០នាក់ រួមជាមួយយន្តហោះយោធា ២៥គ្រឿង និងយានដឹកជញ្ជូនលើសមុទ្រចំនួន ០៣គ្រឿង។ នាវាចម្បាំងនេះមានមូលដ្ឋាន នៅឯស្ថានីយកងនាវា មេយផត (Mayport) ក្នុងក្រុង ចេគសុនវីឡេ (Jacksonville) នៃរដ្ឋផ្លូវរីដា របស់សហរដ្ឋអាមេរិក ហើយសព្វថ្ងៃកំពុងធ្វើប្រតិបត្តិការ នៅក្នុងកងអង្គភាពទី ៦ (Sixth Fleet) នៃកងទ័ពជើងទឹកសហរដ្ឋអាមេរិក។
សមយុទ្ធយោធាខាងលើ ដែលមានឈ្មោះថា Juniper Cobra 2018 ដែលបានចាប់ផ្តើមតាំងពីថ្ងៃទី០៤ ខែមីនា ដោយមានការចូលរួមពីកម្លាំងយោធាសរុបជិត ៥,០០០នាក់ ពីសម្ព័ន្ធមិត្តទាំងពីរនោះ គឺផ្តោតសំខាន់ទៅលើការបង្កើនសមត្ថភាពការពារខ្លួន ពីការវាយប្រហារដោយគ្រាប់មីស៊ីលផ្លោង។
គួរជម្រាបថា នាវា Iwo Jima ដែលត្រូវបានគេឲ្យឈ្មោះតាមកោះរបស់ប្រទេសជប៉ុន ដែលអាមេរិកដណ្តើមយកបាន កាលពីសម័យសង្រ្គាមលោកលើកទីពីរនោះ មានសមត្ថភាពដាក់ពង្រាយ យន្តហោះចម្រុះជាច្រើនប្រភេទ ព្រមទាំងគ្រឿងយន្ត ដែលធ្វើប្រតិបត្តិការលើដីគោក រួមជាមួយយានដឹកជញ្ជូនឆ្លងកាត់សមុទ្រ ខណៈដែលវារក្សាចម្ងាយនៅទីសុវត្ថិភាពពីដីគោក។
បន្ថែមពីនាវាចម្បាំងនេះ ក៏មានឧបករណ៍ និងប្រព័ន្ធផ្សេងៗ ដែលអាចឲ្យយន្តហោះចុះចតនៅលើតួផ្លូវចុះចតប្រវែង ២៥៧ម៉ែត្រ របស់វាផងដែរ នៅពេលដែលនាវានេះផ្ទាល់កំពុងធ្វើចល័តនៅលើផ្ទៃសមុទ្រ ក្បែរតំបន់ផ្ទុះសង្រ្គាម៕
