(បាន់ជូល)៖ ក្រសួងការបរទេសហ្គាំប៊ី បានចេញលិខិតសុំអភ័យទោសមួយច្បាប់ ជូនដល់ប្រទេសថៃ បន្ទាប់ពីរដ្ឋមន្ត្រីវប្បធម៌ និងទេសចរណ៍របស់ខ្លួន គឺលោក ហាម៉ាត់ បាហ៍ (Hamat Bah) បានលើកឡើងដោយសំដៅទៅដល់ប្រទេសថៃថា ជាគោលដៅនៃទេសចរណ៍ផ្លូវភេទនោះ។ នេះបើតាមការចេញផ្សាយដោយ ទីភ្នាក់ងារព័ត៌មានចិន ស៊ីនហួរ នាព្រឹកថ្ងៃអង្គារ ទី០៦ ខែមីនា ឆ្នាំ២០១៨។
សេចក្តីថ្លែងការណ៍ នៃរដ្ឋាភិបាលប្រទេសអាហ្វ្រិកខាងលិចមួយនេះ បានបញ្ជាក់ច្បាស់ៗយ៉ាងដូច្នេះថា «ប្រទេសហ្គាំប៊ីពិតជាសោកស្តាយ នូវការលើកឡើងដោយអចេតនា ដែលត្រូវបានធ្វើឡើងដោយរដ្ឋមន្ត្រីវប្បធម៌ និងទេសចរណ៍។ ការលើកឡើងរបស់រដ្ឋមន្ត្រីរូបនេះ គឺមិនមែនជាជំហរពិតប្រាកដ នៃរដ្ឋាភិបាលហ្គាំប៊ីនោះឡើយ»។
គួរបញ្ជាក់ថា នៅក្នុងកម្មវិធីទូរទស្សន៍មួយ ដែលបានចេញផ្សាយកាលពីថ្ងៃទី១២ ខែមករា ឆ្នាំ២០១៨ លោករដ្ឋមន្ត្រីហ្គាំប៊ីខាងលើនេះ បានថ្លែងប្រាប់ប្រជាជាតិរបស់លោកថា «យើងមិនមែនជាគោលដៅ នៃទេសចរណ៍ផ្លូវភេទនោះទេ។ ប្រសិនបើអ្នកចង់រកគោលដៅផ្លូវភេទ អ្នកទៅប្រទេសថៃចុះ»។ ការលើកឡើងនេះ បានធ្វើឲ្យមានការចាប់អារម្មណ៍ និងរិះគន់ធ្ងន់ៗពីសំណាក់ប្រជាជនថៃ ដែលលេងក្នុងបណ្តាញទំនាក់ទំនងសង្គម ហើយក្រសួងការបរទេសថៃ ក៏បានតវ៉ាស្វែងរកការសុំទោស ពីរដ្ឋាភិបាលហ្គាំប៊ីផងដែរ៕
