(វ៉ាស៊ីនតោន)៖ មនុស្សយ៉ាងហោចណាស់ ០៥នាក់ ក្នុងនោះរួមមានទាំងកុមារៗ ០២នាក់ផងដែរ បានបាត់បង់ជីវិត នៅក្នុងខ្យល់ព្យុះកំណាច ដែលបាននិងកំពុងបោកបក់មកលើតំបន់ឆ្នេរភាគខាងកើត នៃសហរដ្ឋអាមេរិក។ នេះបើតាមការចេញផ្សាយដោយ ទីភ្នាក់ងារព័ត៌មានចិន ស៊ីនហួរ នាព្រឹកថ្ងៃសៅរ៍ ទី០៣ ខែមីនា ឆ្នាំ២០១៨។
អាជ្ញាធរអាមេរិកបានបញ្ជាក់ថា ក្មេងប្រុសអាយុ ០៦ឆ្នាំម្នាក់ បានស្លាប់នៅក្នុងរដ្ឋ វ៉ឺជីនៀ (Virginia) នៅពេលដែលដើរឈើធំមួយដើម បានដួលរលំទៅលើផ្ទះរបស់គ្រួសារក្មេងនោះ កាលពីព្រឹកថ្ងៃសុក្រសប្តាហ៍នេះ ខណៈសមាជិកគ្រួសារទាំងអស់មិនទាន់ទាំងក្រោកពីដំណេកផងនោះ។
បន្ថែមពីនេះទៀតកាលពីល្ងាចថ្ងៃសុក្រ ក្មេងប្រុសម្នាក់ទៀតអាយុ ១១ឆ្នាំ រស់នៅរដ្ឋ ញូយ៉ក បានស្លាប់ក្នុងករណីដូចគ្នា គឺដើមឈើរលំសង្កត់លើផ្ទះរបស់ក្រុមគ្រួសារក្មេងនោះ ដែលស្ថិតនៅក្នុងសង្កាត់ ភុតណាម (Putnam)។ ដោយឡែកម្តាយរបស់កុមាររងគ្រោះ ដែលស្ថិតនៅផ្ទះពេលកើតហេតុនោះដែរ បានទទួលរងរបួសធ្ងន់ និងកំពុងសម្រាកព្យាបាលនៅមន្ទីរពេទ្យ។
គួរបញ្ជាក់ថា ព្យុះកំណាចខាងលើនេះ ត្រូវបានអាជ្ញាធរអះអាងថា នឹងបន្តរហូតដល់ថ្ងៃសៅរ៍សប្តាហ៍នេះ ហើយដោយឡែកមនុស្សស្លាប់ចំនួន ០៣នាក់ទៀត គឺជាមនុស្សមានវ័យចំណាស់ចន្លោះពី ៤៤ឆ្នាំ ទៅ ៧៧ឆ្នាំ សុទ្ធតែត្រូវបានរងគ្រោះដោយដើមឈើរលំសង្កត់ផ្ទះដូចគ្នា៕
