(ញូដេលី)៖ កងកម្លាំងទ័ព​អាកាស​ឥណ្ឌា បានច្រានចោល​ព័ត៌មានដែល​ចុះផ្សាយថា ទីក្រុង​ញូដេលី​បានបញ្ជា​ទិញ​យន្ដហោះ ចម្បាំងអាមេរិក​ម៉ាក F-35A ពីក្រុមហ៊ុន​អាមេរិក Lockheed Martin។ នេះបើតាម​ការចេញផ្សាយ​ដោយ សារព័ត៌មាន Sputnik នៅល្ងាចថ្ងៃសុក្រ ទី០២ ខែមីនា ឆ្នាំ២០១៨។

ការបដិសេធ​នេះ ធ្វើឡើងបន្ទាប់ពី​កាលពី​ថ្ងៃទី១៥ ខែកុម្ភៈ សារព័ត៌មាន​ឥណ្ឌា Business Standard បានចុះ​ផ្សាយថា កងកម្លាំង​ទ័ពអាកាស​ឥណ្ឌា បានដាក់សំណើ​ជាផ្លូវការ ដើម្បី​បញ្ជាទិញយន្ដហោះចម្បាំង​អាមេរិក​ធុន F-35A ជាង ១២៦គ្រឿង ពីក្រុមហ៊ុន Lockheed Martin ក៏ប៉ុន្តែព័ត៌មាន​នេះ​ ត្រូវបានកងកម្លាំងទ័ពអាកាសឥណ្ឌា​បដិសេធ។ «យើងមិន​បានស្នើជាផ្លូវការ ឬការដាក់សំណើ​ណាមួយ​ ដើម្បីបញ្ជាទិញ​យន្ដហោះ F-35A ពីសហរដ្ឋអាមេរិក​នោះ​ឡើយ»។ នេះបើ​តាមការអះអាង​របស់មេញ្ជាការ​ទ័ពអាកាស​ឥណ្ឌា លោក Birender Singh Dhanoa។

គួរបញ្ជាក់ថា បច្ចុប្បន្នឥណ្ឌា​កំពុងធ្វើការអភិវឌ្ឍ​យ៉ាងខ្លាំង លើវិស័យយោធា​របស់ខ្លួន តាមរយៈ​ការផលិត និងការធ្វើតេស្ដ​បរិក្ខា​យោធាជាបន្តបន្ទាប់ ជាពិសេស​គីមីស៊ីល​តែម្ដង។ មួយវិញទៀត ទីក្រុងញូដេលី​ក៏មានបំណងផងដែរ​ ក្នុងការកាត់​បន្ថយការ ទិញបរិក្ខាយោធា​ពីបរទេស សំដៅបង្កើន​ការងារ​នៅក្នុងស្រុក រួមទាំងការ​ពង្រឹង​សមត្ថភាព​​យោធា​របស់ខ្លួន ដោយ​បច្ចេកវិទ្យា​ផ្ទាល់ខ្លួន៕​