(រ៉ង់ហ្គូន)៖ យន្តហោះដឹក​ទំនិញមួយគ្រឿង របស់សហរដ្ឋអាមេរិក បានធ្វើការចុះចត​យ៉ាងបន្ទាន់​បំផុត នៅឯអាកាសយានដ្ឋាន​អន្តរជាតិ នៃទីក្រុងរ៉ង់ហ្គូន សហភាព​មីយ៉ាន់ម៉ា ក្រោយពីមាន​សញ្ញាប្រកាស​អាសន្នថា មានអគ្គីភ័យឆាបឆេះ​បន្ទប់ស្តុកទំនិញ។ នេះបើ​តាមការ​ចេញផ្សាយដោយ ទីភ្នាក់ងារព័ត៌មានចិន ស៊ីនហួរ នាល្ងាចថ្ងៃព្រហស្បតិ៍ ទី០១ ខែមីនា ឆ្នាំ២០១៨។

យន្តហោះ​ខាងលើនេះ គឺមានផ្ទុកនូវ​ទំនិញប្រភេទ «ថ្មផ្ទុកថាមពល ឬអាគុយ Lithium Ion» ប្រមាណ ១៧៥.៧តោន ខណៈនៅលើនោះ​មានអាកាយានិក​បញ្ជាការទូទៅ ចំនួន ០៣នាក់ ហើយបានចុះចតយន្តហោះ​យ៉ាងបន្ទាន់ នៅព្រលានយន្តហោះ​មីយ៉ាន់ម៉ា នៅវេលាម៉ោង ២៖២៥នាទីរសៀល ថ្ងៃព្រហស្បតិ៍នេះ ម៉ោងនៅ​ទីក្រុងរ៉ង់ហ្គូន។

យន្តហោះជាកម្មសិទ្ធិ​របស់ក្រុមហ៊ុន​អាមេរិក United Presal Service Co.Ltd ដែលមាន​មូលដ្ឋាននៅ​សហរដ្ឋអាមេរិក ហើយវាបាន​ធ្វើដំណើរចេញពី​ទីក្រុងហុងកុង ប្រទេសចិន គ្រោងឆ្ពោះ​ទៅកាន់ទីក្រុង​ឌូបៃ នៃប្រទេស​អេមីរ៉ាត់អារ៉ាប់រួម ប៉ុន្តែត្រូវបានបញ្ជា​ឲ្យចុះចត​នៅទីក្រុង​រ៉ង់ហ្គូន ដោយសារបញ្ហា​ដូចខាងលើ។

គួរបញ្ជាក់ថា ពុំមានការឆាបឆេះ​ណាមួយបានលេចឡើង​នោះ​ឡើយ ប៉ុន្តែក្លិន​នៃសារធាតុ​ថ្មផ្ទុកថាមពល​ដែលបានបែក​ធ្លាយនោះ គឺត្រូវបានក្រុម​ជំនាញអះអាង​ថាមាន។ ការស៊ើបអង្កេត​បន្ថែមកំពុង​បន្ត ខណៈយន្តហោះ​ត្រូវរង់ចាំត្រួតពិនិត្យ​សុវត្ថិភាព​ឡើងវិញ៕