(សេអ៊ូល)៖ ប្រធានាធិបតីកូរ៉េខាងត្បូង លោក មូន ជែអ៊ីន នៅថ្ងៃពុធនេះ បានជំរុញយ៉ាងពេញទំហឹង ឱ្យជប៉ុនគិតគូរឡើងវិញពីទង្វើអាក្រក់របស់ខ្លួន កាលពីអតីតកាល ហើយថាទីក្រុងតូក្យូគ្មានសិទ្ធិហើបមាត់និយាយថា បញ្ហាអតីតទាសករផ្លូវភេទត្រូវបញ្ចប់ តាមរយៈកិច្ចព្រមព្រៀងកាលពីឆ្នាំ២០១៥ រវាងប្រទេសទាំងពីរនោះទេ។ នេះបើតាមការចេញផ្សាយដោយ ទីភ្នាក់ងារ សារព័ត៌មាន យ៉ុនហាប់ នៅរសៀលថ្ងៃព្រហស្បតិ៍ ទី០១ ខែមិនា ឆ្នាំ២០១៨។
ថ្លែងនៅក្នុងសុន្ទរកថានាឱកាសចូលរួម ពិធីរំលឹកខួបលើកទី ៩៩ នៃការបង្កើតចលនាឯករាជ្យជាតិ នៅថ្ងៃទី០១ ខែមីនា ឆ្នាំ១៩១៩ លោក មូន ជែអ៊ីន បានលើកឡើងយ៉ាងដូច្នេះថា «ពាក់ព័ន្ធនឹងដំណោះស្រាយអតីតទាសករផ្លូវភេទ រដ្ឋាភិបាលជប៉ុនជាអ្នកទទួលខុសត្រូវ ហើយគ្មានសិទ្ធិនិយាយថា វាត្រូវបានដោះស្រាយហើយនោះឡើយ»។ លោកបន្ថែមថា «ជប៉ុនត្រូវតែប្រឈមមុខនឹង ការពិត និងយុត្តិធម៌ប្រវត្តិសាស្ត្រ មិនតែប៉ុណ្ណោះយើងក៏សង្ឃឹមដែរថា ទីក្រុងតូក្យូ នឹងផ្សះផ្សាដោយស្មោះត្រង់ជាមួយ ប្រទេសជិតខាង ដែលបានទទួលរងការឈឺចាប់ដោយសារជប៉ុន»។
គួររំលឹកថា កាលពីខែធ្នូ ឆ្នាំ២០១៥ រដ្ឋាភិបាលជប៉ុន និងរដ្ឋាភិបាលនៃអតីតប្រធានាធិបតីកូរ៉េខាងត្បូង លោកស្រី ផាក គឺនហេ បានឈានដល់កិច្ចព្រមព្រៀង ក្នុងការដោះស្រាយបញ្ហាអតីតស្ត្រីកូរ៉េខាងត្បូង ដែលត្រូវបានយោធាជប៉ុន បង្ខំឱ្យធ្វើ ជាទាសករផ្លូវភេទនៅអំឡុងសង្រ្គាមលោកលើកទី ២។ ផ្អែកលើកិច្ចព្រមព្រៀងនេះ ជប៉ុនយល់ព្រមបង់ប្រាក់ ០៩លានដុល្លារ ប៉ុន្តែលោក មូន ជែអ៊ីន បានរិះគន់លើកិច្ចព្រមព្រៀងនេះយ៉ាងខ្លាំង៕
