(ម៉ូស្គូ)៖ ខណៈកំពុងចូលរួមក្នុងសង្រ្គាមស៊ីរីមិនទាន់អស់ចិត្ត នៅខាងក្រោយឆាកឯណេះវិញសហរដ្ឋអាមេរិក និងរុស្ស៊ីបានចាប់ផ្ដើមធ្វើសង្រ្គាមពាក្យសម្ដីជាថ្មី ដោយចោទប្រកាន់គ្នាទៅវិញទៅមកថា អ្នកដុតភ្លើង និងអ្នកពន្លត់ភ្លើង គឺមនុស្សតែមួយ។ កាលពីថ្ងៃទី២៧ ខែកុម្ភៈ អគ្គមេបញ្ជាការយោធាអាមេរិក លោក ចូសិប វ៉ូទែល (Joseph Votel) បានបន្ទោសរុស្ស៊ីថា ជាអ្នកដុតបញ្ឆេះសង្រ្គាម ហើយតាំងដើរតួធ្វើជាអ្នកពន្លត់សង្រ្គាមនៅស៊ីរី។
ពាក់ព័ន្ធនឹងការចោទប្រកាន់គ្នានេះដែរ សារព័ត៌មានរុស្ស៊ី Sputnik កាលពីថ្ងៃពុធ ទី២៨ ខែកុម្ភៈ ឆ្នាំ២០១៨ បាននិយាយថា សហរដ្ឋអាមេរិក តែងតែដើរតួជាអ្នកការពារ។ ប៉ុន្តែតាមពិត មនុស្សស្ទើរតែគ្រប់គ្នាសុទ្ធតែដឹងថា ទីក្រុងវ៉ាស៊ីនតោននេះឯង ដែលជាអ្នកដើរដុតបញ្ឆេះ សង្រ្គាម ហើយបង្ខំឱ្យអ្នកដទៃទទួលយកលទ្ធិប្រជាធិបតេយ្យ ស្ដង់ដាអាមេរិកកាំង។ ដើម្បីបញ្ជាក់ពីការអះអាងបែបនេះ Sputnik បានលើកឡើងពីប្រទេសចំនួន ០៤ ដែលសហរដ្ឋអាមេរិកជាដុតបញ្ឆេះសង្រ្គាម ហើយដើរតួជាអ្នកពន្លត់សង្រ្គាម៖
១. អាហ្វហ្គានីស្ថាន៖ នៅឆ្នាំ២០០១ ជាការឆ្លើយតបនឹងមហាភេរវកម្មថ្ងៃទី១១ ខែកញ្ញា ឆ្នាំ២០០១ សហរដ្ឋអាមេរិក ក្រោមរដ្ឋបាលអតីតប្រធានាធិបតីលោក ចច ដាប់ប៊ែលយូ ប៊ូស (George W. Bush) បានសម្រេចចិត្តបញ្ជូនកងទ័ពអាមេរិក ទៅកាន់ប្រទេសអាហ្វហ្គានីស្ថាន ដើម្បីកម្ទេចក្រុមអាល់កៃដា និងរដ្ឋាភិបាលតាលីបង់ នៅពេលនោះ។ ប៉ុន្តែក្នុងរយៈពេលជាង ១៧ឆ្នាំមកនេះ ទីក្រុងវ៉ាស៊ីនតោន មិនអាចបញ្ចប់សង្រ្គាមបានឡើយ រីឯក្រុមតាលីបង់នៅតែគ្រប់គ្រងទឹកដីមួយផ្នែកធំ ហើយការវាយប្រហារបំផ្ទុះគ្រាប់បែកទាំងធំទំាងតូច នៅតែបន្តកើតឡើងស្ទើររាល់ថ្ងៃ។ ចំណែកឯ អ្នករងគ្រោះនៅតែជាប្រជាជនអាហ្វាហ្គានីស្ថាន។
២. អ៊ីរ៉ាក់៖ កាលពីឆ្នាំ២០០៣ រដ្ឋបាលរបស់លោក ចច ដាប់ប៊ែលយូ ប៊ូស (George W. Bush) ដដែលបានលើកទ័ពឈ្លាន ចូលប្រទេសអ៊ីរ៉ាក់ដោយចោទប្រកាន់ថា រដ្ឋាភិបាលរបស់មេដឹកនាំ សាដដាំ ហ៊ូស្សេន (Saddam Hussein) មានអាវុធប្រល័យលោក។ នៅពេលនោះ មានសេចក្ដីរាយការណ៍ជាច្រើន បាននិយាយថា ទីភ្នាក់ងារស៊ើបការណ៍សំងាត់អាមេរិក CIA បញ្ជាក់ថា អ៊ីរ៉ាក់ គ្មានអាវុធនុយក្លេអ៊ែរឡើយ តែលោក ប៊ូស នៅតែបញ្ជាឱ្យ CIA សរសេររបាយការណ៍ថា ទីក្រុងបាកដាដមានអាវុធនុយក្លេអ៊ែរ ដើម្បីឱ្យសភាទម្លាក់កញ្ចប់ថវិកាវាយកម្ទេចរដ្ឋាភិបាលអ៊ីរ៉ាក់របស់ Saddam Hussein។
លើសពីនេះទៅទៀត ក្រោយរបប Saddam Hussein ដួលរលំ អាមេរិកមិនបានរកឃើញថា អ៊ីរ៉ាក់មានអាវុធនុយក្លេអ៊ែរនោះទេ ប៉ុន្តែអ្វីៗបានហួសពេលអស់ទៅហើយ ពោលគឺសង្រ្គាមនៅតែបន្តកើតមាន រហូតដល់ក្រុមភេរវករ ISIS ត្រូវបានបង្កើតឡើង ហើយជនស៊ីវិលស្លូតត្រង់អ៊ីរ៉ាក់រាប់ម៉ឺននាក់ បានបាត់បងជីវិត រីឯសេដ្ឋកិច្ច ព្រមទាំងហេដ្ឋារចនាសម្ព័ន្ធ ត្រូវបំផ្លាញស្ទើរក្លាយជាផេះ។
៣. លីប៊ី៖ ដោយសំអាងថារបបដឹកនាំលីប៊ីរបស់ លោក មួអាម៉ា ហ្គាដាហ្វី (Muammar Gaddafi) រំលោភសិទ្ធិមនុស្ស ក្រុមប្រឹក្សាសន្តិសុខ នៃអង្គការសហប្រជាជាតិដែលមានរុស្ស៊ីខ្លួនឯងជាសមាជិកអចិន្ត្រៃយ៍ផងនោះ បានអនុម័តកាលពីថ្ងៃទី១៧ ខែមិនា ឆ្នាំ២០១១ លើសេចក្ដីព្រាងដំណោះស្រាយរបស់សហរដ្ឋអាមេរិក ក្នុងការធ្វើអន្តរាគមន៍យោធានៅលីប៊ី ដើម្បីបង្កើតលិទ្ធិប្រជាធិបតេយ្យ សម្រាប់ប្រជាជនលីប៊ី។
ប៉ុន្តែអ្វីគឺផ្ទុយពីការរំពឹងទុក ក្រោយរបបដឹកនាំ Gaddafi ដួលរលំ ប្រទេសលីប៊ី និងអ្វីដែលប្រជាជនលីប៊ីធ្លាប់មានក្រោម សម័យដឹកនាំរបស់ជនផ្ដាច់ការរូបនេះ ត្រូវបានគេមើលឃើញថា បានស្លាប់ទៅជាមួយលោក។ លីប៊ីពីប្រទេសអ្នកមាន និង មានសន្តិភាពក្លាយជាប្រទេសត្រូវបំផ្លិចបំផ្លាញ និងអសន្តិសុខបំផុតនៅក្នុងពិភពលោក ស្របពេលប្រជាជនលីប៊ីខ្លះនឹង ស្ដាយស្រណោះលីប៊ីជំនាន់ Gaddafi។
៤. ស៊ីរី៖ ចាប់តាំងពីឆ្នាំ២០១៤ សហរដ្ឋអាមេរិកបានដឹកនាំក្រុមចំរុះអន្តរជាតិ ធ្វើប្រតិបត្តិការវាយប្រហារតាមផ្លូវអាកាសប្រឆាំង នឹងពួក ISIS ដោយគ្មានការអនុញ្ញាតពីប្រទេសស៊ីរី និងអង្គការសហប្រជាជាតិ។ ប៉ុន្តែបើតាមរដ្ឋាភិបាល និងប្រព័ន្ធផ្សព្វផ្សាយស៊ីរី ការវាយប្រហារតាមផ្លូវអាកាសរបស់សហរដ្ឋអាមេរិក បានបណ្ដាលឱ្យជនស៊ីវិលរាប់រយនាក់បាត់បង់ជីវិត ហើយបើនិយាយពីហេដ្ឋារចនាសម្ព័ន្ធ សេដ្ឋកិច្ច ការរស់នៅរបស់ប្រជាជនស៊ីរី ក៏បានធ្លាក់ដល់ចំណុចសូន្យផងដែរ៕
