(ញូយ៉ក)៖ ក្រុមប្រឹក្សាសន្តិសុខអង្គការសហប្រជាជាតិ (UNSC) បានបង្ហាញការសោកស្ដាយជាខ្លាំង ចំពោះបរាជ័យក្នុងការ អនុវត្តន៍បទឈប់បាញ់នៅក្នុងប្រទេសស៊ីរី។ បើទោះជាមានបទឈប់បាញ់ ក៏ការវាយប្រយុទ្ធគ្នានៅតែបន្តកើតមាន ហើយភាគី ជម្លោះបានចោទប្រកាន់ដាក់គ្នាទៅវិញទៅមក ខណៈប្រជាជនស៊ីវិលស៊ីរីហាក់ដូចជាកំពុងរស់នៅក្នុងនរកនៅលើដី។ នេះ បើតាមការចេញផ្សាយដោយ ទីភ្នាក់ងារសារព័ត៌មានចិន ស៊ីនហួរ នៅព្រឹកថ្ងៃព្រហស្បតិ៍ ទី០១ ខែមិនា ឆ្នាំ២០១៨។
កាលពីថ្ងៃសៅរ៍ សប្ដាហ៍មុន UNSC បានអនុម័តដំណោះស្រាយលេខ ២៤០១ ដោយអំពាវនាវឱ្យមានបទឈប់បាញ់ រយៈពេល ៣០ថ្ងៃ នៅទូទាំងប្រទេសស៊ីរី ដើម្បីទុកលទ្ធភាពឱ្យក្រុមមន្ត្រីមនុស្សធម៌ ដឹកជំនួយទៅកាន់ប្រជាជនស៊ីរី។ ក៏ប៉ុន្តែបទ ឈប់បាញ់នេះមិនត្រូវបានគេគោរពឡើយ ហើយការវាយប្រយុទ្ធគ្នានៅតែបន្តកើតមាននៅក្នុងតំបន់ ហ្គួតា (Ghouta) ភាគខាងកើត ។
ដោយឡែក ជុំវិញបញ្ហានេះដែរថ្លែងនៅចំពោះមុខ UNSC កាលពីថ្ងៃពុធ មន្ត្រីជាន់ខ្ពស់យូអិនទទួលបន្ទុកកិច្ចការនយោបាយ លោក ចេហ្វហ្វ្រេយ៍ ហ្វែលមែន (Jeffrey Feltman) បានសម្ដែងការសោកស្ដាយជាខ្លាំង ចំពោះការរំលោភលើបទឈប់បាញ់។ «យើងនៅទីនេះសាជាថ្មី ពីព្រោះដំណោះស្រាយលេខ ២៤០១ ស្ដីពីបទឈប់បាញ់កាលពីប៉ុន្មានមុន មិនត្រូវបានគេគោរព ហើយវាគ្មានពាក្យ ណាមួយ ដើម្បីបង្ហាញពីការព្រួយបារម្ភរបស់យើងនោះឡើយ។ ប៉ុន្តែការព្រួយបារម្ភនេះ មិនអាចប្រៀបធៀបទៅនឹងការឈឺចាប់ របស់ប្រជាជនស៊ីរីបាននោះទេ»។ នេះជាការលើកឡើងរបស់លោក Jeffrey Feltman។
គួរបញ្ជាក់ថា បើតាមលោក Jeffrey Feltman ជនស៊ីវិលយ៉ាងហោចណាស់ ៥៨០នាក់ ក្នុងនោះមានកុមាររាប់រយនាក់ ត្រូវបានសម្លាប់ និង១,០០០នាក់ផ្សេងទៀតរងរបួស នៅក្នុងការវាយប្រយុទ្ធគ្នា រវាងកងកម្លាំងរដ្ឋាភិបាលស៊ីរី និងក្រុមឧទ្ទាមស៊ីរី នៅក្នុងតំបន់ Ghouta ភាគខាងកើតចាប់តាំងពីថ្ងៃទី១៨ ខែកុម្ភៈមក៕
