(ស៊ីដនី)៖ អាជ្ញាធរនៃ​ប្រទេសប៉ាពួញូហ្គីណេ ​បានរាយការណ៍ថា មនុស្ស​ជាង ៣០នាក់ ត្រូវបានគេ​ព្រួយបារម្ភថា​ អាចបាត់បង់ជីវិតបាត់ទៅហើយ និងមនុស្សជាង ៣០០នាក់​ ទៀតរង​របួស នៅក្នុងគ្រោះ​រញ្ជួយដីកំរិតធ្ងន់ធ្ងរខ្លាំង ៧.៥រ៉ិចទ័រ ដែលបាន​វាយប្រហារ​លើប្រទេស ដែនកោះភាគខាងលិច​មហាសមុទ្រប៉ាស៊ីហ្វិក​​មួយ​​នេះ។ នេះបើតាម​ការចេញផ្សាយ​ដោយ​សារព័ត៌មាន Sputnik នៅព្រឹកថ្ងៃអង្គារ ទី២៧ ខែកុម្ភៈ ឆ្នាំ២០១៨។ 

​ថ្លែងនៅក្នុង​សេចក្ដីថ្លែងការណ៍​របស់ខ្លូន អាជ្ញាធរ​ប៉ាពួញូហ្គីណេ បានបញ្ជាក់​ដូច្នេះថា «មនុស្ស​ច្រើន​ជាង ៣០នាក់ ត្រូវបានគេ​រាយការណ៍ថា បានបាត់​បង់ជីវិត ប៉ុន្តែព័ត៌មាន​នេះមិនទាន់​ទទួលស្គាល់​ជាផ្លូវការនៅ​ឡើយទេ»។

ទីភ្នាក់ងារ​តាមដានភូមិ​សាស្ត្រ​អាមេរិក USGS កាលពីថ្ងៃចន្ទម្សិលមិញ​នេះ​​បានឱ្យដឹងថា គ្រោះរញ្ជួយដី​​កំរិត ៧.៥រ៉ិចទ័រ បានវាយប្រហារ​​នៅ​ចំងាយ ៩៦គីឡូ​ម៉ែត្រ ពីភាគ​និរតីទីក្រុង មែនឌី (Mendi) ស្ថិតនៅភាគ​​ខាងត្បូង តំបន់​ហៃឡេនស៍ (Highlands) របស់ប្រទេស​​ដែនកោះ ប៉ាពួញូហ្គីណេ (Papua New Guinea)។

គួរបញ្ជាក់​ថា បើតាមទីភ្នាក់ងារ​ដដែល គ្រោះរញ្ជួយដី​នេះ​មានជម្រៅ​​រញ្ជួយ ៣៥គីឡូម៉ែត្រ ទៅក្នុងដី។ ទីក្រុង Mendi មានប្រជាជន​​រស់នៅប្រមាណ​ជា ៥០,០០០នាក់។ Papua New Guinea ជារឿយៗ​តែង តែជួបប្រទះគ្រោះរ​ញ្ជួយដី ដោយសារមានស្ថានដី​ស្ថិតនៅតំបន់ខ្សែ​ក្រវ៉ាត់ភ្នំភ្លើង​ នៃមហាសមុទ្រប៉ាស៊ីហ្វិក ដែលងាយ​នឹងរងឥទ្ធិពល​ដោយរញ្ជួដី បន្ទុះភ្នំភ្លើង និងព្យុះសង្ឃរា​ផងដែរ៕