(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ បាននិយាយថា កិច្ចចរចាជាមួយកូរ៉េខាងជើង អាចធ្វើទៅបាន តែនៅក្នុងលក្ខខណ្ឌល្អតែប៉ុណ្ណោះ។ បើទោះជាមិនបានបញ្ជាក់ពីលក្ខខណ្ឌនោះក៏ដោយ ក៏ប៉ុន្តែគេដឹងថា លោកទំនងជា ចង់លើកឡើងពីកិច្ចសន្ទនាស្ដីពីការលុបបំបាត់ អាវុធនុយក្លេអ៊ែរនៅលើឧបទ្វីបកូរ៉េ។ នេះបើតាមការចេញផ្សាយដោយ ទីភ្នាក់ងារសារព័ត៌មាន យ៉ុនហាប់ នៅព្រឹកថ្ងៃអង្គារ ទី២៧ ខែកុម្ភៈ ឆ្នាំ២០១៨។
ការកត់សម្គាល់បែបនេះរបស់ លោក ដូណាល់ ត្រាំ កើតមានឡើងបន្ទាប់ពីកូរ៉េខាងជើង បាននិយាយដល់ទៅពីរដងថា ខ្លួនមានត្រៀមខ្លួនរួចជាស្រេច ក្នុងកិច្ចសន្ទនាជាមួយទីក្រុងវ៉ាស៊ីនតោន។ «ពួកគេ (កូរ៉េខាងជើង) ចង់ពិភាក្សា ហើយយើងក៏ចង់ពិភាក្សាដែរ ប៉ុន្តែកិច្ចចរចាទាំងនោះ អាចធ្វើទៅបាននៅតែក្នុងលក្ខខណ្ឌល្អតែប៉ុណ្ណោះ បើពុំដូច្នោះទេ យើងនឹងមិនពិភាក្សាជាមួយពួកគេនោះទេ»។ នេះបើតាមការគូសបញ្ជាក់របស់លោក ដូណាល់ ត្រាំ កាលពីថ្ងៃចន្ទ នៅក្នុងជំនួបនឹង អភិបាលរដ្ឋអាមេរិកនៅសេតវិមាន។
គួរបញ្ជាក់ថា បើទោះជាមិនបានបញ្ជាក់ពីលក្ខខណ្ឌនោះក៏ដោយ ក៏ប៉ុន្តែគេដឹងថា លោកទំនងជាចង់លើកឡើងពីកិច្ចសន្ទនា ស្ដីពីការលុបំបាត់អាវុធនុយក្លេអ៊ែរ នៅលើឧបទ្វីបកូរ៉េ។ យ៉ាងណាក៏ដោយ ទីក្រុងព្យុងយ៉ាង ធ្លាប់អះអាងថា នឹងមិន លើកយកកម្មវិធីនុយក្លេអ៊ែរ ដាក់លើតុចរចាជាមួយទីក្រុងវ៉ាស៊ីនតោនជាដាច់ខាត ហើយអាវុធនុយក្លេអ៊ែររបស់ខ្លួន គឺមានគោលដៅតែលើសហរដ្ឋអាមេរិកតែមួយគត់៕
