(ប៉េកាំង)៖ យន្តហោះដឹកអ្នកដំណើរផលិតចិនដំបូង C919 បានទទួលការបញ្ជាទិញរហូតដល់ទៅ ៣០គ្រឿងបន្ថែមទៀត ដែលធ្វើឲ្យចំនួនសរុបពីការបញ្ជាទិញនោះ ឡើងដល់ ៨១៥គ្រឿងហើយ ពីសំណាក់អាកាសចរណ៍ក្នុងស្រុក និងអន្តរជាតិ។ នេះបើតាមការចេញផ្សាយដោយ ទីភ្នាក់ងារព័ត៌មានចិន ស៊ីនហួរ នារសៀលថ្ងៃចន្ទ ទី២៦ ខែកុម្ភៈ ឆ្នាំ២០១៨។
សាជីវកម្មយន្តហោះពាណិជ្ជនៃប្រទេសចិន (COMAC) បានចុះហត្ថលេខា លើកិច្ចព្រមព្រៀងទិញដូរមួយ ជាមួយនិងក្រុមហ៊ុន Huarong Financial Leasing Co. , Ltd សម្រាប់ការលក់យន្តហោះ C919 ចំនួន ៣០គ្រឿង និងយន្តហោះ ARJ21 ចំនួន ២០គ្រឿង ដែលពិធីនេះត្រូវបានធ្វើឡើង នៅឯទីស្នាក់ការក្រុមហ៊ុន ក្នុងរដ្ឋធានីប៉េកាំង។
គិតមកទល់នឹងចុងខែកុម្ភៈនេះ ក្រុមហ៊ុនរបស់ចិនបានទទួលការបញ្ជាទិញ ៨១៥គ្រឿង នៃប្រភេទយន្តហោះថ្មី C919 ពីអតិថិជនក្នុងស្រុក និងក្រៅប្រទេសចំនួន ២៨ក្រុមហ៊ុន។ ដោយឡែកយន្តហោះប្រភេទ ARJ21 ទទួលបានការបញ្ជាទិញ ៤៥៣គ្រឿង មកពីអតិថិនជនចំនួន ២១។
សម្រាប់ការធ្វើតេស្តហោះហើរយន្តហោះ C919 ដែលជាប្រភេទយន្តហោះដឹកអ្នកដំណើរខ្នាតធំ ផលិតដោយក្រុមហ៊ុនក្នុងស្រុកចិនផ្ទាល់ ត្រូវបានធ្វើឡើងនៅទីក្រុងសៀងហៃ ហើយវាបានបញ្ចប់ដោយជោគជ័យ ជាគ្រឿងទីពីរ នៃការធ្វើតេស្ត។
សម្រាប់យន្តហោះ C919 គ្រឿងទីពីរនេះ ត្រូវបានយកទៅធ្វើតេស្តនៅឯអាកាសយានដ្ឋានទីក្រុងសៀងហៃ ភាគខាងកើតប្រទេសចិន កាលពីថ្ងៃអាទិត្យ ទី១៧ ខែធ្នូ ហើយទទួលបានជោគជ័យបន្ថែមទៀត បន្ទាប់ពីយន្តហោះប្រភេទដដែលខាងលើនេះគ្រឿងទី ១ ត្រូវបានធ្វើតេស្តដោយជោគជ័យ លើការហោះហើរទាំងផ្លូវជិត និងផ្លូវឆ្ងាយកាលពីប៉ុន្មានខែមុន។
សម្រាប់មួយគ្រឿងដំបូង ដែលសម្រេចការហោះសាកល្បងដែរនោះ គឺត្រូវបានក្រុមជំនាញធ្វើតេស្តសាកល្បង ដោយធ្វើការហោះហើរចេញពី អាកាសយានដ្ឋានអន្តរជាតិ Pudong នៃទីក្រុងសៀងហៃដដែល និងបានទៅដល់មូលដ្ឋាននៃការធ្វើតេស្ត ស្ថិតនៅក្នុងតំបន់ Xi'an Yanliang ស្ថិតនៅក្នុងខេត្តហ្សានស៊ី ដែលជាការធ្វើតេស្តជោគជ័យ នៃការធ្វើដំណើរឆ្ងាយបំផុតរបស់ C919 ក្នុងរយៈចម្ងាយ ១,៣០០គីឡូម៉ែត្រ ក្នុងកម្ពស់ ៧,៨គីឡូម៉ែត្រ។
គួរបញ្ជាក់ថា C919 មានសមត្ថភាពផ្ទុកអ្នកដំណើរពី ១៥៦នាក់ ទៅ ១៦៨នាក់ ដែលចិនប្តេជ្ញាថា នឹងធ្វើការប្រកួតប្រជែងជាមួយយន្តហោះ Boeing 737 និង Airbus A320 ដែលកំពុងតែពេញនិយមបំផុតលើលោក នាពេលបច្ចុប្បន្ន។ មួយវិញទៀតក្រុមហ៊ុន COMAC បានអះអាងថា ខ្លួនទទួលបានការកក់យន្តហោះប្រភេទ C919 នេះចំនួន ៥៧០គ្រឿងហើយពីក្រុមហ៊ុនចំនួន ២៣ ហើយសម្រាប់តម្លៃនោះ គឺមួយគ្រឿងខ្ទង់ ៥០លានដុល្លារអាមេរិក ថោកជាងប្រភេទដូចគ្នារបស់ក្រុមហ៊ុន Boeing និង Airbus រហូតដល់ទៅ ៣០ភាគរយ។ សម្រាប់ក្រុមហ៊ុនដែលយក C919 មកបម្រើអតិថិជនដំបូងវិញនោះគឺ អាកាសចរណ៍ភាគខាងកើតចិន China Easter Airlines៕
