(ព្យុងយ៉ាង)៖ សាធារណរដ្ឋប្រជាធិបតេយ្យ ប្រជាមានិតកូរ៉េ (កូរ៉េខាងជើង) បានចេញសេចក្តីថ្លែងការណ៍មួយ រិះគន់យ៉ាងពេញទំហឹង ចំពោះអគ្គលេខាធិការ នៃអង្គការសហប្រជាជាតិ (UN) គឺលោក អាន់តូនីញ៉ូ ហ្គួទែរែស (Antonio Guterres) ជុំវិញការគាំទ្រឲ្យមានការដាក់ទណ្ឌកម្មបន្ថែម ដែលធ្ងន់ធ្ងរជាងមុនទៅលើទីក្រុងព្យុងយ៉ាង ដើម្បីឆ្លើយតបនឹងកម្មវិធីមីស៊ីលផ្លោង និងនុយក្លេអ៊ែរនោះ។ នេះបើតាមការចេញផ្សាយដោយ ទីភ្នាក់ងារព័ត៌មានចិន ស៊ីនហួរ នារសៀលថ្ងៃចន្ទ ទី២៦ ខែកុម្ភៈ ឆ្នាំ២០១៨។
សារព័ត៌មានរដ្ឋកូរ៉េខាងជើង KCNA ដែលរបស់រដ្ឋាភិបាលកូរ៉េខាងជើងនោះ ត្រូវបានដកស្រង់សេចក្តីថ្លែងការណ៍យ៉ាងដូច្នេះថា «អគ្គលេខាធិការ UN បានធ្វើឡើងដោយគ្មានហេតុផលអ្វីបន្តិចសោះ អំពីការដាក់សម្ពាធបន្ថែម តាមរយៈទណ្ឌកម្ម ប្រឆាំងនឹងប្រទេសកូរ៉េខាងជើង។ នេះគឺជាការភ័ន្តច្រឡំដ៏ធំមួយ ដែលមិនសមហេតុផល និងឋានៈរបស់លោក ក្នុងនាមជាអគ្គលេខាធិការ UN នោះឡើយ ព្រោះលោកធ្វើខ្លួនត្រឹមជាអាយ៉ងរបស់អាមេរិក»។
គួរបញ្ជាក់ថា ការថ្លែងធ្ងន់ៗមិនធ្លាប់មានខាងលើនេះរបស់កូរ៉េខាងជើង បានកើតមានឡើងបន្ទាប់ពីអគ្គលេខាធិការ UN នៅក្នុងកិច្ចប្រជុំសន្តិសុខសកល នៅទីក្រុងម៉ូនិក ប្រទេសអាល្លឺម៉ង់ បានថ្លែងចំពោះមុខថ្នាក់ដឹកនាំពិភពលោកថា «ការពង្រឹងអំណាចនុយក្លេអ៊ែរកូរ៉េខាងជើង គឺផ្ទុយនឹងឆន្ទៈរបស់សហគមន៍អន្តរជាតិ» ដែលប្រការនេះត្រូវបានកូរ៉េខាងជើងរិះគន់ធ្ងន់ៗ និងចោទថា លោក ហ្គួទែរែស គ្រាន់តែជាអ្នកតស៊ូមតិមួយរូប ជំនួសឲ្យអាមេរិកប៉ុណ្ណោះ៕
