(អាមេរិក)៖ សំនួរជាច្រើនត្រូវបានចោទឡើង នៅពេលដែល SpaceX ជាក្រុមហ៊ុនបច្ចេកវិទ្យា-អវកាសឯកជន តែអាចបោះជំហានទៅមុខយ៉ាងលឿន លើសពីការស្មាន ខណៈដែលអង្គការ NASA ដែលមានបទពិសោធន៍ជាកន្លះសតវត្សរ៍ តែហាក់នៅហ្នឹងថ្នល់ពេលខ្លះ ដោយសារតែថវិកាជាតិទម្លាក់មកដូចភ្លៀងរលឹម។ នេះបើតាមការដកស្រង់ចេញពីវែបសាយបច្ចេកវិទ្យា The Hill របស់អាមេរិក នាព្រឹកថ្ងៃចន្ទ ទី២៦ ខែកុម្ភៈ ឆ្នាំ២០១៨។
ជាក់ស្តែងបំផុតនោះ គឺការហោះហើរនាពេលថ្មីៗនេះរបស់គ្រាប់រ៉ុក្កែត SpaceX Falcon Heavy បាននិងកំពុងធ្វើឱ្យពិភពលោក ភ្ញាក់ផ្អើលយ៉ាងខ្លំាង។ គ្រាប់រ៉ុក្កែតប្រភេទនេះ អាចបញ្ជូនវត្ថុមានទម្ងន់ ៦៤តោន ទៅកាន់គន្លងតារាវិថី ដែលនេះបានធ្វើឱ្យវាកា្លយជាយានដឹកនាំមួយ ដ៏មានឥទ្ធិពលបំផុតនៅលើពិភពលោក ក្នុងនាំយកវត្ថុធំៗពីផែនដី ឡើងទៅកាន់ទីអវកាស។
ងាកទៅមើលនាយកប្រតិបត្តិ (CEO) ក្រុមហ៊ុន SpaceX លោក អេឡន ម៉ាស់ក៍ (Elon Musk) បានប្រើប្រាស់គ្រាប់រ៉ុក្កែត Falcon Heavy ដើម្បីបាញ់បង្ហោះរយថន្ដ ដើរដោយថាមពលអគ្គិសនី Tesla Roadster ជាមួយមនុស្សជ័រមានឈ្មោះថា Starman ទៅកាន់ទីអវកាស។ វីដេអូរបស់ Starman នៅលើតួរថយន្ដអាវកាសនេះ ជាមួយផែនដី ដែលគេឃើញកង់របសើវាវិលថយក្រោយ គឺការបង្ហាញអំពីតំណាងនៃឆ្នាំ២០១៨ ហើយបើសិនជាមិនមានអ្វី ដែលអស្ចារ្យជាងនេះលេចឡើងនោះទេ វានឹងក្លាយជានិមិត្តរូបមួយទសវត្សរ៍ក៏អាចដែរ។
លើសពីនេះទៅទៀត ក្រុមហ៊ុនមួយនេះ ក៏កំពុងធ្វើការជាមួយយានអវកាសដ៏ធំមួយឈ្មោះថា Big Falcon Rocket (BRF)។ BRF នឹងក្លាយជាយានបាញ់បង្ហោះ ដែលមានសមត្ថភាពនាំវត្ថុមានទម្ងន់ ១៥០តោន ទៅកាន់គន្លងគោចរកម្រិតទាបនៃផែនដី ហើយមិនតែប៉ុណ្ណោះ វាក៏ជាក្ដីស្រម៉ៃមួយផងដែររបស់ លោក Elon Musk ក្នុងការបំពេញបេសកកម្មទៅកាន់ភពព្រះអង្គារ និងឋានព្រះច័ន្ទ។
ការធ្វើតេស្ដរបស់ BFR ត្រូវបានគេគ្រោងនឹងធ្វើឡើង នៅកន្លែងបាញ់បង្ហោះនៃក្រុមហ៊ុន SpaceX នៅឆ្នាំ២០១៩ ខាងមុខនេះ ជាមួយគន្លងហោះហើរទៅកាន់គន្លងតារាវិថី ក្នុងរយៈពេលពីរទៅបីឆ្នាំ ហើយបេសកកម្ម ទៅកាន់ឋានព្រះច័ន្ទនឹងធ្វើឡើងនៅពេលបន្ទាប់។ ម្យ៉ាងវិញទៀត គ្រប់គ្នាហាក់ដូចជាគ្មានការសង្ស័យឡើយ ចំពោះរឿងនេះ ព្រោះលោក Elon Musk មានសមត្ថភាពធ្វើអ្វីដែលគាត់បានលើកឡើង ពីព្រោះគាត់បានទទួលជោគជ័យជាច្រើនរួចមកហើយ។
ជាក់ស្តែងភាពប្រទាញប្រទង់គ្នា បានកើតមានឡើងរួចទៅហើយ ដែលវាអាចត្រូវបានគេមើលឃើញថា ជាការតស៊ូមតិរវាងអ្នកគាំទ្រការអភិវឌ្ឍរបស់អង្គការ NASA និងការបោះជំហានយក្សរបស់ SpaceX។ អ្វីដែលមិនអាចប្រកែកបាននោះ គឺ SpaceX ជាក្រុមហ៊ុនឯកជន ប៉ុន្តែមានគោលដៅមិនទៅលើតែពាណិជ្ជកម្មទាំងស្រុងនោះឡើយ ដោយភាពអស្ចារ្យ និងការសម្រេចគោលដៅរបស់ CEO ក្រុមហ៊ុន ហាក់ឈរនៅមុខគំរោងនានា បូករួមទាំងគំនិតជាតិនិយមផងដែរ។ ប៉ុន្តែសម្រាប់ NASA វិញការរីកចំរើនរបស់ SpaceX ទំនងជារូបភាពមួយ ដែលអាចគ្របដណ្តប់សក្តានុពល និងកិត្តិនាមរបស់ខ្លួន ក្នុងនាមជាអ្នកឈរលេខ ១ លើលោករាប់ទសវត្សរ៍មកហើយ៕
