(ស៊ីដនី)៖ ទីភ្នាក់ងារ​ភូមិសាស្ត្រ​អាមេរិក នៅថ្ងៃចន្ទនេះ​បានឱ្យដឹងថា គ្រោះរញ្ជួយដី​កំរិត ៧.៥រ៉ិចទ័រ បានវាយប្រហារ​នៅ​ចំងាយ ៩៦គីឡូម៉ែត្រ ពីភាគ​និរតីទីក្រុង មែនឌី (Mendi) ស្ថិតនៅភាគ​ខាងត្បូង តំបន់ ហៃឡេនស៍ (Highlands) របស់ប្រទេស​ដែនកោះ ប៉ាពួញូហ្គីណេ (Papua New Guinea)។ នេះបើ​តាមការចេញ​ផ្សាយ​ដោយ​ ទីភ្នាក់ងារ​សារព័ត៌មាន​ចិន ស៊ីនហួរ នៅព្រឹកថ្ងៃចន្ទ ទី២៦ ខែកុម្ភៈ ឆ្នាំ២០១៨។

យោងតាម​ទីភ្នាក់ងារភូមិសាស្ត្រ​អាមេរិក គ្រោះរញ្ជួយដី​នេះមានកំរិត ៧.៥រ៉ិច និងមានជម្រៅ​រញ្ជួយ ៣៥គីឡូម៉ែត្រ ទៅក្នុងដី។ ប៉ុន្តែ​ភ្លាមៗ​ពុំទាន់មាន​សេចក្ដីរាយការណ៍​ពីជន​រងគ្រោះ ឬការ​បំផ្លិចបំផ្លាញ​នៅឡើយទេ ហើយក៏មិនមាន​ការប្រកាស​សញ្ញាអាសន្ន ពីរលកយក្ស​ស៊ូណាមិដែរ។

គួរបញ្ជាក់​ថា ទីក្រុង Mendi មានប្រជាជន​រស់នៅប្រមាណ​ជា ៥០,០០០នាក់។ Papua New Guinea ជារឿយៗ​តែង តែជួបប្រទះគ្រោះរ​ញ្ជួយដី ដោយសារមានស្ថានដី​ស្ថិតនៅតំបន់ខ្សែ​ក្រវ៉ាត់ភ្នំភ្លើង​ប៉ាស៊ីហ្វិក ដែលងាយនឹងរងឥទ្ធិពល​ដោយរញ្ជួដី បន្ទុះភ្នំភ្លើង និងព្យុះសង្ឃរាផងដែរ៕