(ញូយ៉ក)៖ ក្រុមប្រឹក្សាសន្តិសុខអង្គការសហប្រជាជាតិ បានអនុម័តជាឯកច្ឆ័នលើដំណោះស្រាយមួយ ដោយស្នើឱ្យមានបទឈប់បាញ់រយៈពេល៣០ថ្ងៃ នៅក្នុងប្រទេសស៊ីរី ដើម្បីជួយសម្រួលដល់ការផ្ដល់ជំនួយ ខណៈចំនួនអ្នកស្លាប់នៅក្នុង ការវាយប្រហារតាមផ្លូវអាកាស បានកើនដល់ជាង៥០០នាក់។ នេះបើតាមការចេញផ្សាយដោយសារព័ត៌មាន BBC នៅថ្ងៃអាទិត្យ ទី២៥ ខែកុម្ភៈ ឆ្នាំ២០១៨។

ការអនុម័តលើដំណោះស្រាយនេះកាលពីថ្ងៃសៅរ៍ (ម៉ោងនៅទីក្រុងញូយ៉ក) កើតមានឡើងនៅចំពេលស្ថានភាពនៅក្នុង តំបន់​ហ្គួតា (Ghouta) កំពុងស្ថិតនៅក្រោមការវាយប្រហារតាមផ្លូវអាកាស យ៉ាងសន្ធាប់ពីសំណាក់យន្ដហោះចម្បាំង រដ្ឋាភិបាលស៊ីរី គំាទ្រដោយរុស្ស៊ី។ បន្ថែមពីលើនេះ បើតាមអង្គការឃ្លំាមើលសិទ្ធិមនុស្សស៊ីរី មនុស្សយ៉ាងហោចណាស់៥០០នាក់ បានបាត់បង់ជីវិត និងជាង ២,១២០នាក់​ទៀត ក៏បានរងរបួស​ផងដែរ ដោយសារតែការវាយប្រហារផ្លូវអាកាស អស់រយៈពេលមួយសប្ដាហ៍មកនេះ។

គួរបញ្ជាក់ថា បទឈប់បាញ់ខាងលើ មិនត្រូវបានអនុវត្តលើប្រតិបត្តិការប្រយុទ្ធប្រឆាំងនឹងក្រុម ISIS, អាល់កៃដា ឬក៏ក្រុម រណសិរ្ស Al-Nusra នោះទេ ហើយដែលនេះនៅតែជាបញ្ហាចោទ សម្រាប់បទឈប់បាញ់ ដ្បិតភាគីជម្លោះជារឿយៗតែង យកលេសកម្ទេចក្រុមភេរវករទាំងនេះ ដើម្បីឆ្លៀតវាយប្រហារដាក់គ្នាទៅវិញទៅមក៕