(តេហេរ៉ង់)៖ ក្រុមសង្គ្រោះ​អ៊ីរ៉ង់នៅព្រឹកថ្ងៃពុធនេះ (ម៉ោងនៅតេហេរ៉ង់) បាន​ចាប់ផ្តើមប្រើប្រាស់ឧទ្ធម្ភាគចក្រ ​ដឹកសាកសព​មនុស្ស​ជាបន្តបន្ទាប់ ចេញពី​ជម្រាលភ្នំទឹកកក នៅភាគកណ្តាល​ឈាង​ខាងត្បូងប្រទេស​នោះហើយ ក្រោយពីយន្តហោះ​អ៊ីរ៉ង់មួយគ្រឿង បានធ្លាក់នៅទីនោះ​​ជាមួយមនុស្ស​ជិះសរុប ៦៥នាក់ កាលពី​ថ្ងៃអាទិត្យសប្តាហ៍​មុន។ នេះបើតាម​ការចេញផ្សាយ​ព័ត៌មាន ដកស្រង់​ពីបណ្តាញ AFP នាល្ងាច​ថ្ងៃពុធ ទី២១ ខែកុម្ភៈ ឆ្នាំ២០១៨។

ជើងហោះហើរ​នៃអាកាសចរណ៍​អ៊ីរ៉ង់ Aseman EP3704 ត្រូវបាន​ក្រុមសង្គ្រោះ​អះអាងម្តង​ទៀតថា គ្មាននរណាម្នាក់​នៅរស់រានមាន​ជីវិតនោះឡើយ ក្រោយយន្តហោះ​ធ្លាក់ រយៈពេលបីថ្ងៃ​កន្លងទៅនេះ។ ប្រជុំភ្នំ Dena ដែល​ឧទ្ធម្ភាគចក្រ​សង្គ្រោះទើបតែ​ទន្ទ្រានចូលទៅដល់​នោះ មានរយៈកម្ពស់​រហូតដល់​ទៅជាង ៤,០០០ម៉ែត្រ​ឯណោះ ហើយវាជាតំបន់ភ្នំព្រិលគ្របដណ្តប់ដ៏ក្រាសក្រែល​ថែមទៀត។

មេបញ្ជាការដែលដឹកនាំ​ក្រុមសង្គ្រោះ​ខាងលើនេះ គឺលោក​ឧត្តមសេនីយ Nozar Nemati បានបញ្ជាក់ប្រាប់​ទូរទស្សន៍រដ្ឋអ៊ីរ៉ង់ថា «នៅក្នុងខណៈពេលនេះ យើងនៅតែឃើញ​មានព្រិល​ធ្លាក់ខ្លាំង និងខ្យល់បោក​យ៉ាងសន្ធប់ ដែលនាំឲ្យយើងពិបាកនៅក្នុងរុករក​សាកសព​ជនរងគ្រោះ​ខ្លាំងណាស់។ យើងអាចសម្រេច​ចិត្តយកសាកសព​ដែលយើងឃើញ​ជាមុនសិន រួចកងកុម៉្មង់ដូនឹង​ដឹកសាកទាំងនោះ​មកវិញ»។ គិតត្រឹម​ពេលនេះ សាកសព​ប្រមាណជា ៣២នាក់ហើយ ត្រូវបាន​យកចេញពី​គំនរព្រិល និងកម្ទេចកម្ទីរ​យន្តហោះ។

គួររំលឹកថា យន្តហោះ​​ប្រភេទ ATR-72 មានជើងហោះ​ហើរលេខ EP3704 ផលិតនៅ​​ឆ្នាំ១៩៩៣ ដែលត្រូវបានចាត់​ទុកជាយន្តហោះ​វ័យចំណាស់មួយ ទុកសម្រាប់ធ្វើ​ដំណើរ​តែ​ក្នុងស្រុក ដែលមានរយៈចម្ងាយ​ខ្លីប៉ុណ្ណោះ ហើយវាបាន​ធ្លាក់នៅព្រឹក​ថ្ងៃអាទិត្យ (ម៉ោងនៅ​ទីក្រុង​តេហេរ៉ង់) ដោយបានសម្លាប់​មនុស្សទាំង​អស់ ៦៥នាក់ (អ្នកដំណើរ ៥៩នាក់ និង​សហសេវិក ០៦នាក់) ដែលពីដំបូង​ឡើយមានសេចក្តីរាយការណ៍​ថា មនុស្សជិះនៅលើនោះ​ទាំងអស់​មានរហូតដល់ ៦៦នាក់។

ចំណែកឯ កត្តាចម្បងដែល​បាននាំឲ្យយន្តហោះ​​ធុនមធ្យមរបស់អ៊ីរ៉ង់ ធ្លាក់នៅតំបន់​ភ្នំភាគខាងត្បូង​ប្រទេសនេះ អាចបណ្តាលមក​ពី​កត្តាអាកាសធាតុអាក្រក់​​ជាចម្បង ដែលមាន​ដូចជា អ័ព្ទចុះខ្លាំង ព្រិលធ្លាក់ និងខ្យល់បក់បោក​ខ្លាំងជាដើម។

យន្តហោះ ATR-72 មានគោលដៅ​ពីទីក្រុងតេហេរ៉ង់ ឆ្ពោះទៅកាន់​ទីក្រុង Yasuj ភាគខាងត្បូង​ប្រទេសដែលមានចម្ងាយ ​ហោះហើរ ៧៨០គីឡូម៉ែត្រ ប៉ុន្តែវា​បានធ្លាក់នៅតំបន់​ភ្នំ Zagros ដែលមានអាកាសធាតុ​អាក្រក់ខ្លាំង៕