(ម៉ានីល)៖ អ្នកនាំពាក្យ​របស់ប្រធានាធិបតី​ហ្វីលីពីន លោក រ៉ូឌ្រីហ្គោ ឌូតើតេ នៅថ្ងៃពុធនេះ បានថ្កោលទោស​យ៉ាងខ្លាំង ចំពោះ សេចក្ដីរាយការណ៍​ដែលថា ក្រុម​ស៊ើបការណ៍​សំងាត់​អាមេរិក​បានចាត់ទុក​ លោ​ក ឌូតឺតេ ជាមេដឹកនាំ​គំរាមកំហែង​ដល់លិទ្ធិ ប្រជាធិបតេយ្យ និងសិទ្ធិមនុស្ស​នៅក្នុងតំបន់​អាស៊ីអាគ្នេយ៍។ នេះបើតាមការ​ចេញផ្សាយដោយ​ ទីភ្នាក់ងារ​សារព័ត៌មាន​ចិន ស៊ីនហួរ នៅរសៀលថ្ងៃពុធ ទី២១ ខែកុម្ភៈ ឆ្នាំ២០១៨។

យោងតាម​របាយការណ៍ ចេញផ្សាយកាលពី​ថ្ងៃទី១៣ ខែកុម្ភៈ ដោយការិយាល័យ​នាយកទីភ្នាក់ងារ​ស៊ើបការណ៍សំងាត់ជាតិ​អាមេរិក ឲ្យដឹងថា លោក ឌូតើតេ ត្រូវបានបញ្ចូលឈ្មោះរួមជាមួយនិង វិបត្តិជនជាតិរ៉ូហ៊ីងយ៉ា និងរដ្ឋធម្មនុញ្ញ​ នៃរបបយោធាថៃ ទៅក្នុងបញ្ជីខ្មៅនៃ ការគំរាមកំហែង​ដល់លិទ្ធិប្រជាធិបតេយ្យ​ និងសិទ្ធិនៅក្នុង​តំបន់។

តែយ៉ាងណា​ក៏ដោយ អ្នកនាំពាក្យ​លោក ឌូតឺតេ បានទាត់ចោល​របាយការណ៍នេះ ។ អ្នកនាំពាក្យ លោក ហារី រ៉ូក (Harry Roque) បានកត់សម្គាល​​ដូច្នេះថា «ខ្ញុំមិន​គិតថា វាជាការពិត​នោះទេ។ គាត់ (លោក ឌូតឺតេ) មិនមែន​ជាជនផ្ដាច់ការ តែគាត់​ជាអ្នក​ច្បាប់ម្នាក់ គាត់យល់​ពីច្បាប់ គាត់ចង់​រក្សានីតិរដ្ឋ ហើយគាត់​ដឹងយ៉ាង ច្បាស់ពី​សិទ្ធិមនុស្ស។ លើសពីនេះ​ទៅទៀត ប្រព័ន្ធផ្សព្វផ្សាយ​ហ្វីលីពីន នៅតែអាច​ចុះផ្សាយនូវអ្វី​ដែលពួកគេចង់​ផ្សាយ ក្នុងនោះរួមមាន​ទាំងព័ត៌មាន​មិនពិត រីឯប្រព័ន្ធ​តុលាការ និងនីតិបញ្ញតិក៏នៅតែដំណើរការ​ធម្មតា​ដែរ»

គួរបញ្ជាក់ថា មនុស្ស​ច្រើនជាង ៤,០០០នាក់ ត្រូវបានសម្លាប់​នៅក្នុងសង្រ្គាម​គ្រឿងញៀន​របស់លោក ឌូតើតេ ចាប់តាំងពី​ខែកក្កដា ឆ្នាំ២០១៦មក។ ម្យ៉ាងវិញទៀត បើទោះជាមាន​ការថ្កោលទោស​ពីអន្តរជាតិ ជាពិសេស​សហរដ្ឋអាមេរិក​ក៏ដោយ ក៏មេដឹកនាំមាត់​ឆៅរូបនេះ នៅតែអះអាង​ថា លោកនឹងបន្តសង្រ្គាម​ប្រឆាំងនឹងឧក្រិដ្ឋជន​គ្រឿងញៀន​រហូតដល់ទីបំផុត ដើម្បីសន្តិសុខ និងសុភមង្គល​របស់ប្រជាជន​ហ្វីលីពីន។ ប៉ុន្តែទន្ទឹមគ្នា រដ្ឋអាជ្ញានៃ​តុលាការឧក្រិដ្ឋកម្ម​អន្តរជាតិ បានបើក ការត្រួតពិនិត្យ​ជាបឋមលើសង្រ្គាម​ប្រឆាំងនឹងគ្រឿងញៀន​របស់ លោក ឌូតឺតេ ហើយ៕